WAUT es hia loos? De Kjennich von Babielon haft een grootet Fast utjereet un haft dusent huachbeaumte Menschen enjelot. See brucken de goldne un selwane Kuffels un Kommen, waut von Jehova sienen Tempel en Jerusalem sent. Oba met eemol seenen see doa eene Haunt, waut doa aune Waunt schrift. An woat aula Angst.

To dee Tiet wia Belsazar de Kjennich. Daut wia Nebukadnezar sien Grootsän. Hee roopt siene kluake Mana un säd to dee: ‘Wäa dise Schreft läsen kaun un mie sajcht, waut dee bediet, dän woa ekj väle Jeschenkja jäwen un dee woat em Kjennichrikj de dredda von daut väaschte woaren.’ Oba kjeena von de kluake Mana kunn de Schreft läsen uk nich sajen, waut dee bedied.

Dän Kjennich siene Mutta hieed, daut doa waut loos wia, un kjeem doa en de groote Faststow nenn. See säd to dän Kjennich: ‘Enjst du die nich soo sea. Doa es een Maun en dien Kjennichrikj, waut de heilje Jetta kjant. Aus dien Grootvoda Nebukadnezar Kjennich wia, muak hee dän toom Väaschten von aul siene kluake Mana. Dän sien Nomen es Daniel. Lot dän komen un dee woat die sajen, waut dise Schreft bediet.’

Daniel wort fuaz oppe Städ jeholt. Daut ieeschte säd Daniel, hee wull kjeene Jeschenkja. Dan holp hee Belsazar denkjen, wuarom Jehova sienen Grootvoda Nebukadnezar eemol fa een Stoot aus Kjennich raufjesat haud. ‘Daut wia, wiels hee soo stolt wia’, säd Daniel, ‘un Jehova bestroft am doafäa.’

Dan säd Daniel to Belsazar: ‘Du hast von aul dit jewist, waut met Nebukadnezar passieed, un best doawäajen krakjt soo stolt, aus hee wia. Du hast de Kuffels un de Kommen jenomen, waut en Jehova sienen Tempel wieren, un hast ut dee jedrunken. Du hast Jetta von Holt un Steen jeieet enne Städ onsen grooten Schepfa. Doawäajen haft Gott de Haunt jeschekjt toom dise Wieed oppschriewen.

Un dit es, waut doa jeschräwen steit: MENE, MENE, TEKEL un PARSIEN.

MENE bediet, Gott haft de Doag von dien Kjennichrikj jetalt un doa een Enj met jemoakt. TEKEL bediet, du best opp eene Wichtschol jewoagen worden un best nich goot jenuach. PARSIEN meent, dien Kjennichrikj woat de Meeda un de Persa jejäft.’

Aus Daniel dit säd, hauden de Meeda un Persa aul aunjefongen, Babielon auntojriepen. Dee neemen de Staut en un muaken Belsazar doot. Un soo erfeld de Schreft aune Waunt sikj noch deeselwje Nacht! Oba waut wudd nu met de Israeliten passieren? Wie woaren boolt seenen. Oba ieescht well wie seenen, waut met Daniel wort.