WANEM nao happen long hia? Olketa pipol enjoyim bigfala kaikai. King bilong Babylon invaetem plande thousand important man. Olketa iusim olketa gold and silver kap and dish from temple bilong Jehovah long Jerusalem. Bat, seknomoa, finger bilong wanfala hand hem kamap and start for raet long wall. Evriwan fraet fogud.

Distaem, Bel·shazʹzar, granpikinini bilong Neb·u·chad·nezʹzar, hem king. Hem singaot long olketa wise man bilong hem for kam. King hem sei: ‘Eniwan wea savve readim disfala raeting and minim long mi bae mi givim hem plande present and hem bae kamap mek-thri important ruler long disfala kingdom.’ Bat no eni wise man savve readim raeting long wall, or talem mining bilong hem.

Mami bilong king herem disfala noise and kam long bigfala rum wea olketa kaikai. Hem sei long king: ‘Plis no fraet tumas. Wanfala man long kingdom bilong iu hem savve long olketa holy god. Taem grandadi bilong iu Neb·u·chad·nezʹzar hem king, hem mekem hem chief bilong evri wise man bilong hem. Nem bilong hem Daniel. Askem hem for kam, and hem bae talem iu wanem nao mining bilong diswan.’

So stretawe olketa tekem kam Daniel. Hem rejectim olketa present wea olketa laek givim long hem, and then hem talem why nao Jehovah aotem grandadi bilong Bel·shazʹzar, Neb·u·chad·nezʹzar olsem king. Daniel hem sei: ‘Hem praod fogud and Jehovah panisim hem.’

Daniel talem Bel·shazʹzar: ‘Bat nomata iu savve long evri samting wea happen long Neb·u·chad·nezʹzar, iu barava praod olsem hem. Iu tekem olketa kap and dish from temple bilong Jehovah and drink from olketa. Iu praisem olketa god bilong timba and ston, and iu nating honorim Nambawan Creator bilong iumi. Dastawe God sendem datfala hand for raetem olketa toktok hia.’

Daniel hem sei moa: ‘Diswan nao samting wea hem raetem, MEʹNE, MEʹNE, TEʹKEL and PARʹSIN.’

‘MEʹNE minim God hem markem namba bilong olketa day for iu rul and hem finis nao. TEʹKEL minim hem weim iu long scale and faendem hao iu nating gud. PARʹSIN minim hem givim kingdom bilong iu long olketa bilong Media and Persia.’

Taem Daniel hem toktok yet, olketa bilong Media and Persia start for attakim Babylon. Olketa tekova long datfala taon and killim dae Bel·shazʹzar. Raeting long wall hem kamap tru long datfala sem naet! Bat wanem nao bae happen long olketa Israelite? Bae iumi faendaot, bat firstaem iumi bae lukim samting wea happen long Daniel.