¿LA AWETAʼM su tijan kbʼan pa ri wachbʼäl? Wa täq winaq e kʼo pa jun nimqʼij. Ri ajawinel rech Babilonia xeʼusikʼij sibʼalaj e kʼi täq winaq nim kibʼantajik. Tijan kkekoj ri täq jalajoj uwäch täq laq xkesaj lo pa ri loqʼalaj ja rech Jehová kʼo Jerusalén. Xaq kʼateʼ, xqʼaljin ri täq uwiʼ uqʼabʼ jun achi tekʼuriʼ xutzʼibʼaj chuwäch ri xan. Konojel ri winaq xkexibʼij kibʼ.

Belsasar ukʼojol ri ukʼojol Nabucodonosor, are ajawinel kimik. Xubʼij chike ri rajpatinel che kkekʼam lo ri täq rajqʼij. Tekʼuriʼ xubʼij chike: ‹Jachin laʼ kkunik kusikʼij uwäch ri tzʼibʼatalik xuqujeʼ kubʼij su kraj kubʼij›, ‹kinya sibʼalaj täq kʼi sipanik che xuqujeʼ kubʼan urox ajawinel sibʼalaj nim ubʼantajik pa ri qʼatbʼaltzij›, xchaʼ ri ajawinel. Tekʼuriʼ nijun chike ri ajqʼij xkunik xusikʼij uwäch ri tzʼibʼatal chuwäch ri xan, xuqujeʼ xekun täj xkebʼij su kraj kubʼij.

Ri unan ri ajawinel xuta wariʼ, rumal laʼ xok bʼi pa ri tijbʼal wa. ‹Xaq maxibʼij awibʼ›, xchaʼ che ri ajawinel. ‹Pa ri aqʼatbʼaltzij kʼo jun achi che retaʼm kiwäch ri loqʼalaj täq dioses. Chiʼ ri amam Nabucodonosor xubʼan ajawinel ojer, xubʼan nim che, che kiwäch ri täq rajqʼij. Daniel ubʼiʼ. Chabʼij che, che kpetik, tekʼuriʼ Daniel kubʼij chawe su kraj kubʼij wariʼ›, xchaʼ che.

Rumal laʼ xkʼam lo chanim ri Daniel. Chiʼ ri Daniel xraj täj kukʼam ri täq sipanik che kyaʼ che, Daniel xok, o xuchaplej, che ubʼixik suche Jehová xresaj jumul ri Nabucodonosor pa ri ajawbʼäl. ‹Nabucodonosor sibʼalaj xubʼan nim che ribʼ›, xchaʼ Daniel. ‹Rumal laʼ Jehová xukʼajsaj uwäch.›

‹Tekʼuriʼ at awetaʼm ronojel ri xbʼantajik›, xchaʼ ri Daniel che Belsasar, ‹xuqujeʼ xabʼan nim che awibʼ junam rukʼ ri Nabucodonosor ojer. Awesam lo täq jalajoj uwäch laq rech ri loqʼalaj ja rech Jehová. Ayaʼom kiqʼij täq dioses, tekʼuriʼ ayaʼom ta uqʼij ri nimalaj Ajawaxel. Rumal laʼ ri Ajawaxel xutaq lo jun qʼabʼ, o qʼabʼaj, rech xutzʼibʼaj wa täq tzij riʼ›.

‹Ri tzʼibʼatalik are wariʼ›, xchaʼ Daniel: ‹MENÉ, MENÉ, TEKEL xuqujeʼ PARSÍN›.

‹MENÉ kraj kubʼij che ri Ajawaxel xaq rajilam chi ri aqʼij pa ri ajawbʼäl rumal che katresaj na. Xuqujeʼ TEKEL kraj kubʼij che xatpaj pa jun pajbʼal tekʼuriʼ xilik che at utz täj. Xuqujeʼ PARSÍN kraj kubʼij che ri aqʼatbʼaltzij kyaʼ che ri täq medos xuqujeʼ chike ri täq persas.›

Chiʼ tijan kchʼaw na Daniel, ri täq medos xuqujeʼ ri Persas xeʼok bʼi che ubʼanik chʼoj pa Babilonia. Xkechap ri täq winaq e kʼo pa ri tinamit tekʼuriʼ xkekamsaj ri Belsasar. ¡Ri xtzʼibʼax chuwäch ri xan xbʼan pa wajun chaqʼabʼ! Tekʼuriʼ ¿su kkeriq na ri täq israelitas kimik? Kqil na, nabʼe chqilaʼ su xuriq ri Daniel.