YE NYEN asi ge? Gbia ti Babylone atisa akota zo saki oko ti ga na mbeni kota matanga. Ala yeke nyon ye na yâ ti akopo ti lor na ti argent na ala yeke te nga ye na yâ ti asembe so ala mû ni lani kue na yâ ti temple ti Jéhovah na Jérusalem aga na ni. Me, mo ye ti bâ, maboko ti zo asigigi na ayeke sara mbeti na tere ti mur. Mbeto agbu azo ni kue.

Belschazzar, tarä ti Nébucadnezzar, ayeke gbia fadeso. Lo dekongo ti tene a ga na awandara ti lo. Lo tene: ‘Zo so adiko atënë so na lo fa nda ni na mbi, mbi yeke mû na lo amatabisi mingi na mbi yeke sara si lo ga ota kota zo ti komande na yâ ti royaume ni.’ Me wandara oko alingbi ti diko na ti fa nda ti atënë so a sara na tere ti mur so pëpe.

Mama ti gbia ni amä wuluwulu so na lo ga na kota ndo so ala yeke te kobe dä. Lo tene na gbia ni: ‘Zia mbeto asara mo pëpe. Mbeni zo na yâ ti royaume ti mo ayeke dä so ahinga anzapa so ayeke nzoni-kue. Lani so âta ti mo Nébucadnezzar ayeke gbia, lo zia lo mokonzi na ndo ti awandara ti lo kue. Iri ti lo ayeke Daniel. Tokua zo ti ga na lo, na lo yeke fa na mo nda ti atënë so kue.’

A gue a mû Daniel a ga na lo hio na gbia ni. Na peko ti so Daniel ake ti mû amatabisi ni, lo to nda ti fa na Belschazzar nda ni so Jéhovah azi ândö âta ti lo Nébucadnezzar na ndo ti mbata ti gbia. Lo tene: ‘Baba asi lani bê ti Nébucadnezzar, na ye so asara si Jéhovah afâ ngbanga na ndo ti lo.’

Daniel angbâ ti sara tënë, lo tene: ‘Me mo hinga aye so asi na lo so kue; atâa so kue, mo ngbâ lakue ti duti na baba na bê ti mo tongana Nébucadnezzar. Mo mû akopo na asembe ti temple ti Jéhovah na mo nyon ye na yâ ni. Mo yä iri ti anzapa so a sara ala na keke nga na tênë, na mo gonda Kota Wasarango e pëpe. A yeke nda ni la si Nzapa atokua maboko so ti sû atënë so ge.’

Daniel atene: ‘Atënë so a sû so ayeke, MENE, MENE, TEKEL na UPHARSIN.’

‘MENE aye ti tene so Nzapa adiko lango ti royaume ti mo awe na lo sara si a yeke hunzi. TEKEL aye ti tene so a zia mo na ndo ti kilo na a bâ so mo lingbi pëpe. UPHARSIN aye ti tene so a mû royaume ti mo na aMède nga na aPerse.’

Na ngoi so Daniel angbâ ti sara tënë, andâ aMède na aPerse aga na bira awe na ndo ti Babylone. Ala mû kodoro ni kue na ala fâ Belschazzar. Atënë so a sara na ndo ti mur so aga tâ tënë tâ gi na bï ni so! Me nyen la ayeke si fadeso na azo ti Israël so ayeke angbâa na Babylone? E yeke bâ ande tënë na ndo ni. Me ti fadeso zia e bâ ye so asi na Daniel.