SAN e pasa dya? Den sma e hori wan bigi fesa. A kownu fu Babilon kari wan dusun prenspari sma kon. Den e gebroiki den solfru nanga gowtu kan nanga den preti di Nebukadnesar ben teki na a tempel fu Yehovah na Yerusalem. Ma wantronso, den finga fu wan sma anu e kon na ini a loktu èn e bigin skrifi na a skotu. Ala sma e skreki te fu dede.

Belsasar, a granpikin fu Nebukadnesar, de kownu now. A e bari taki den musu tyari den koni man fu en kon. ’Iniwan sma di man leisi den wortu disi èn man fruteri mi san den wani taki’, a kownu e taki, ’sa kisi furu presenti èn a sa tron a di fu dri moro prenspari tiriman na ini a kownukondre.’ Ma nowan fu den koniman man leisi den wortu di skrifi na a skotu noso fruteri san den wani taki.

A mama fu a kownu e yere a babari èn e kon na a bigi kamra pe den e nyan. ’Tangitangi, no frede so’, a e taigi a kownu. ’Wan man de na ini yu kownukondre, di sabi den santa gado. Di yu grantata Nebukadnesar ben de kownu, a ben meki a man dati de edeman fu ala koni man. A nen fu en na Danièl. Seni kari en èn a sa fruteri yu san ala den sani disi wani taki.’

Wantewante den e go teki Danièl kon. Baka di Danièl ben weigri fu teki iniwan presenti, dan a e bigin fruteri fu san ede Yehovah ben puru a grantata fu Belsasar, Nebukadnesar, fu de kownu. ’A ben abi heimemre tumusi’, Danièl e taki. ’Yehovah ben strafu en.’

’Ma yu’, Danièl e taigi Belsasar, ’ben sabi ala san ben pasa nanga en, èn toku ete yu abi heimemre neleki Nebukadnesar. Yu tyari den kan nanga preti fu a tempel fu Yehovah kon dringi èn nyan na ini den. Yu ben prèise gado fu udu nanga ston èn yu no ben gi grani na wi Bigi Mekiman. Dati meki Gado ben seni na anu kon fu skrifi den wortu disi.’

’Disi na san skrifi’, Danièl e taki: ’MEʹNE, MEʹNE, TEʹKEL èn PARʹSIN.’

’MEʹNE wani taki, dati Gado teri den dei fu yu kownukondre èn tyari en kon na wan kaba. TEʹKEL wani taki, dati den wegi yu na tapu a wegi, ma den feni yu tumusi lekti. PARʹSIN wani taki, dati den e gi yu kownukondre na den sma fu Media nanga Persia.’

Aladi Danièl e taki ete, dan den sma fu Media nanga Persia bigin feti kaba nanga Babilon. Den e wini a foto èn e kiri Belsasar. Den wortu na a skotu e kon tru na a srefi neti dati! Ma san sa pasa now nanga den Israelsma? Dati wi sa si heri esi, ma meki wi luku fosi san e pasa nanga Danièl.