NDIÉJUNʼ xtáa rarígá gi̱i̱ rá. Xa̱bu̱ bugi̱ guáʼdáá mbá ndxa̱a̱ mba̱a̱. Rey ndrígóo Babilonia niʼthún rí maguwáʼ mbaʼin ra̱ʼkhá tháán mbaʼin xa̱bu̱ bi̱ guáʼdáá wéñuʼ numún. Ikhiin kuwa rajmún copas ga̱jma̱a̱ rayaʼ rí ñajunʼ oro, plata rí nigájnuu náa templo ndrígóo Jeobá dí rígá náa Jerusalén. Mbá nacha̱, nakujmaa ñawúunʼ mbáa xa̱biya̱ ga̱jma̱a̱ nagíʼdu̱u̱ naʼni ajngáa náa pared. Xúgínʼ namiñun.

Belsasar, aʼdá xíñiiʼ Nabucodonosor ñajunʼ rey xúgi̱. Ikhaa nandxa̱ʼwá rí maguwáʼ kudiin xa̱bi̱i̱ bi̱ guáʼdáá wéñuʼ edxu̱ún, rey naʼthí: ‹Bi̱ gájma̱ñuu maguxnuu rí kiʼthá náa pared ga̱jma̱a̱ naʼthúnʼ dí eyoo gáʼthi, magruigú mbaʼa regalos ga̱jma̱a̱ mani̱ndxu̱u̱ riajtsíin Xa̱bu̱ Ñajunʼ bi̱ magiʼdoo wéñuʼ numuu náa reino›. Mú nimbáa xa̱bu̱ bi̱ gíʼdoo wéñuʼ edxu̱u̱ ejmañuu maguxnuu rí kiʼthá náa pared, asndu na̱nguá má ejmañuu maʼtájuíi.

Ru̱dúu̱ rey naʼdxun rí nawan, ikhú nato̱ʼo̱o̱ náa nuphiʼtsu. Ikhaa naʼthúu̱n rey: ‹Mbá péñu, xámiñaʼ. Náa reino ndrígáʼ xtáa mbá xa̱biya̱ bi̱ naninúnʼ dios bi̱ ñajúnʼ santu. Nákha xiʼñáanʼ Nabucodonosor ninindxu̱u̱ rey, nigíiʼ mu mbayá edxu̱u̱ náa xúgínʼ xa̱bi̱i̱ bi̱ guáʼdáá wéñuʼ edxu̱ún. Ikhaa nagumbiʼyuu Daniel. Atani̱i̱ rí ma̱ʼkha̱ Daniel ga̱jma̱a̱ ikhaa gaʼtháánʼ rí eyoo gáʼthi xúgíʼ rígi̱›.

Ikha jngó naguwáʼ kuya̱a̱ nacha̱ Daniel. Nda̱wa̱á rí táʼndoo magruigú regalos, Daniel nagíʼdu̱u̱ naʼthí náa numuu rí Jeobá niriya kayuʼ rí ní xánindxu̱u̱ rey xiʼñúuʼ Belsasar. Daniel naʼthí: ‹Ikhaa niʼnimbamínáʼ wéñuʼ. Ga̱jma̱a̱ Jeobá niʼni rí ikhaa mbayáminuʼ wéñuʼ›.

Daniel naʼthúu̱n Belsasar: ‹Mú ikháánʼ natayáá xúgíʼ rí nigíʼnuu, ga̱jma̱a̱ xóó natanimbamínáʼ xóo má ninindxu̱u̱ Nabucodonosor. Ni̱dxa̱ʼ xtaʼ copas ga̱jma̱a̱ rayaʼ dí rígá náa templo ndrígóo Jeobá ma̱ngaa niwanla ga̱jma̱a̱. Nitayamajkún dios bi̱ kiʼni̱i̱n ga̱jma̱a̱ ixi̱ ga̱jma̱a̱ itsí ga̱jma̱a̱ na̱nguá nitayamajkuíí bi̱ Phú Niʼni Májánʼ Xúgíʼ. Ikha jngó Dios nikuʼma ñawúunʼ xa̱bu̱ mu maʼni ajngáa rígi̱›.

Daniel naʼthí, rí kiʼthá ñajunʼ: ‹MENE, MENE, TEKEL ga̱jma̱a̱ PARSIN›.

‹MENE nandoo gáʼthi rí Dios niguxnuu mbiʼi rí maratañájunʼ ga̱jma̱a̱ ikhaa niʼni rí ní xáratañájunʼ. TEKEL nandoo gáʼthi rí nigiewáán náa mbá balanza ga̱jma̱a̱ ndiyáá rí na̱nguá ni̱ndxa̱ʼ mbáa xa̱bu̱ májánʼ. PARSIN nandoo gáʼthi rí reino ndrígáʼ mixnún xa̱bu̱ medos ga̱jma̱a̱ xa̱bu̱ persas.›

Nákha Daniel xóó xtáa raʼthí, xa̱bu̱ medos ga̱jma̱a̱ xa̱bu̱ persas nugíʼdi̱i̱ nuxnamijná náa Babilonia. Natu̱ʼu̱u̱n náa xuajin ga̱jma̱a̱ nuxiyáa Belsasar. ¡Ajngáa rí kiʼthá náa pared nambánuu má mbruʼun rúʼko̱! Mú, ndiéjunʼ egiʼnii israelitas xúgi̱ rá. Mbuʼyáá nda̱wa̱á, mu xúgi̱ atangaánʼ mbuʼyáá rí nigíʼnuu Daniel.