¿KʼELA jasa wan ekʼel ja il? Ja ixuk winiki yiʼoje jun niwan kʼin. Ja mandaranum bʼa Babilonia slokunej jitsan mil bʼa matik ay niwak xchole. Wane yajel makunuk ja bʼis bʼa oro, bʼa plata soka basijaʼik eleljan bʼa stemplo ja Jyoba bʼa Jerusalén. Junta chʼaykʼujol, jun yal kʼabʼal bʼa winik chiknaji sok kʼe tsʼijbʼanuk ja bʼa sat naʼitsi. Yibʼanal ja matik teyeʼi kʼe xiwuke.

Ja Belsasar, ja yij ja Nabucodonosor, yeʼnxa ni mandaranum. Ja yeʼn yawan ja yaʼtijum aʼijukjan yi ja skʼintanum jumasaʼ sok yala: «Ja maʼ oj skʼumuk sok oj yalkabʼ jas wa stojolan ja jas tsʼijbʼunubʼal bʼa sat naʼitsi ojni kayi jitsan jastik junuk, sok yeʼnani oj kʼot ajyuk ja yoxil mandaranum mas tʼilani». Pe mini june ja bʼa skʼintanumi wa xbʼobʼ yujile snajel sok yaljel jas wa stojolan ja jas tsʼijbʼunubʼali.

Yajni ja snan ja mandaranum yabʼ xwoʼoljiye ja ixuk winik ja bʼa kwarto wane waʼeli, och oche sok yala yabʼ ja mandaranumi: «Mok xiwan. Ja bʼa wa mandaraneli ay jun winik wa snaʼa sbʼaja dyosiki. Yajni jawa tatawelo Nabucodonosor mandaranum ay ajyi, ya och olomal sbʼaja tuk skʼintanumiki. Sbʼiʼil Daniel. Jeka spayjel, soka yeʼn ojni yalawabʼ jasa wa stojolan».

Ja yuj weʼgo jekji spayjel ja Daniel. Tsaʼan yajni ja yeʼn mi syama ja majtanalik kʼapji yi, kʼe yal jas yuj ja Jyoba sjapayi ja xchol yiʼoj ajyi ja statawelo ja Belsasari. Ja Daniel yala: «Ja yeʼn jel niwan yaʼa sbʼaj, ja yuj ja Jyoba skʼulan kastigar».

«Pe ja weʼn waxa naʼa jasa chʼak ekʼ sbʼaj», jachʼ alji yabʼ ja Belsasar yuja Daniel, «sok ja weʼn jelni chaʼan xa kʼulanabʼaj, jastal ja Nabucodonosor. Ja wiʼonejan ja bʼisik soka basijaʼik bʼa stemplo ja Jyoba sok jani waxa wuʼajsok. Jani waxa toyo dyosik kʼulubʼal sok ton ma teʼ, sok mi jaʼa toyunejuk ja niwan Dyos maʼ skʼulunej ja jastik junuki. Ja yuj ja Dyos sjekunej ja kʼabʼali bʼa stsʼijbʼajel ja jastik junuk it.

«Ja it ja jas wa xyala», xchi ja Daniel: «MENÉ, MENÉ, TEQUEL sok PARSÍN».

«MENÉ wa stojolan ja Dyos sbʼisunej ja skʼakʼuʼil ja wa mandaraneli sok oj ya chʼakuk. TEQUEL wa stojolan ja wa mandaraneli aʼubʼal bʼa jun balansa, sok wa x-ilxi mini lekuka. PARSÍN wa stojolan ja wa mandaraneli oj sbʼajinkan ja chonabʼ Media soka Persia.»

Wanto kʼumal ja Daniel yajni ja kʼakʼanumik bʼa Media soka bʼa Persia ochyejan sok sbʼajinekan ja chonabʼi sok smilawe ja Belsasar. Ja akʼwal jaw, ja jas tsʼijbʼunubʼal bʼa sat naʼitsi jachʼni ekʼa. Pe ja yan, ¿jasa oj ekʼ sbʼaj ja israʼelenyoʼiki? Tsaʼanto oj jnebʼtik. Ja weʼgo la kiltik jasa oj ekʼ sbʼaj ja Danieli.