ANA cici cacikutendekwa apanoci? Ŵanduŵa ali pacindimba cekulungwa. Mwenye jwa ku Babelo aŵilasisye acalendo ŵakusosekwa macilamacila. Jemanjaji akukamulicisya masengo makapu ga golidi ni ga silifa, mbale, yaŵajigele m’nyumba ja Yehofa ku Yelusalemu. Nambo mwakusisimucisya, yala ya mundu yakumagasa yikuwonecela mwinani ni kutanda kulemba pepupa. Jwalijose woga umkamwile.

Belisasala, cisukulu ca Nebukadinesala, ali mwenye. Jwalakwe akuŵilasya acalume ŵakwe ŵalunda kuti ayice. Mwenyejo akuŵeceta kuti: ‘Mundu jwalijose jwampaka aŵalanje yakulembekwayo ni kusalila kugopolela kwakwe, cacipocela mituka jejinji, soni caciŵa jwakulamulila jwakunguya jwatatu jwakusosekwa mnope mu ucimwene.’ Nambo pangali jwalijose mwa acalumewo jwakupakombola kuŵalanga yayilembece pepupapo, soni kusala kagopolele kakwe.

Mamagwe mwenye akupikana kusinganga ni akwawula mu cipinda cekulungwa cakulila yakulya. Ni akwasalila mwenye kuti: ‘Conde akakola woga mnope, apali mundu mu ucimwene wawo jwakusamanyilila milungu jeswela. Paŵalamulilaga anganga ŵawo Nebukadinesala, ŵapele ukumu wakuŵa jwamkulungwa jwa acalume ŵalunda wosope. Lina lya mundu jweleju lili Daniyele. Am’ŵilanje jwalakwe, cacasalila kagapolele kayindu yosopeyi.’

Sambano ndaŵi jijojo akum’ŵilasya Daniyele. Pakanile kupocela mtuka uliwose, Daniyele akutanda kusala ligongo lyakwe Yehofa ŵatyosisye anganga ŵakwe Belisasala ŵaŵaliji Nebukadinesala pa ucimwene. Daniyele akuŵeceta kuti: ‘Jwalakwe ŵaliji jwakulikwesya, ni Yehofa ŵampele cilango.’

Daniyele akumsalila Belisasala kuti: ‘Nambo mmwejo mkumanyilila yosope yayamtendecele jwalakwejo, nambo mkulikwesya mpela muŵatendelaga Nebukadinesalamo. Mjigele makapu ni mbale m’nyumba ja Yehofa nikumwelagamo. Mkulambila milungu jakupanganya ni yitela soni maganga, soni ngamkumcimbicisya Mkupanganya Jwamkulungwa jwetu. Ni ligongo lyakwe Mlungu atumisye ligasa kukulemba maloŵe gelega.’

Daniyele akuŵeceta kuti: ‘Yakulembekwayo yili ayi,’ ‘MEʹNE, MEʹNE, ‘TEʹKEL ni PARʹSIN.’

‘MEʹNE akugopolela kuti Mlungu aŵalasile masiku ga ucimwene wenu ni kuwumala. TEʹKEL akugopolela kuti amlinjile pa cakulinjila ni pangali cambone cacipatikene. PARʹSIN kugopolela kuti ucimwene wenu upelecekwe kwa Amedi ni Apelesi.’

Daniyele pakwendelecela kuŵeceta, Amedi ni Apelesi atandite kwinjila mu Babelo. Jemanjaji akusumula msindawo, soni Belisasala akum’wulaga. Yelembekwe pepupa yila yikutendekwa cilo celeco! Ana sambano Ayisalayeli ciyatendecele yatuli? Cituyiwone pacangakaŵapa, nambo candanda kwende tulole kaje yayikumtendecela Daniyele.