¿BAʼAX ku yúuchul teʼelaʼ? Le máakoʼobaʼ táan u beetkoʼob upʼéel nojoch kʼiimbesaj. U reyil Babiloniaeʼ u taasmaj u milesi máakoʼob jach kʼaj óolaʼanoʼob. Táan u meyajtiʼob le copaʼob beetaʼan yéetel orooʼ, le beetaʼanoʼob yéetel plataoʼ bey xan le nukuch tazaʼob chʼaʼabanoʼob tu temploi Jerusalenoʼ. Chéen ka ilaʼab u chíikpajal u kʼab utúul máak, ka joʼopʼ u tsʼíib teʼ pakʼ yéetel u yaal u kʼaboʼ. Ka jaʼakʼ u yóol tuláakal le máakoʼoboʼ.

Teʼ kʼiinoʼob jeʼeloʼ Belsasar u yáabil Nabucodonosor ku beetik u reyil. Letiʼeʼ tu yawtaj ka taasaʼak le máaxoʼob ku naʼatoʼoboʼ, ka tiaʼalaj: Le máax kun páajtal u xokik yéetel u yaʼalikten baʼax u kʼáat yaʼal le tsʼíibaʼ, yaan u siʼibil yaʼab baʼaloʼob tiʼ yéetel yaan xan u beetkuba u yóoxtúul maas nojoch jalaʼachil tiʼ le reinoaʼ. Baʼaleʼ mix utúul tiʼe j-naʼatoʼob páajchaj u xokik le tsʼíib yaan teʼ pakʼoʼ, mix xan u tsolik baʼax u kʼáat u yaʼalej.

U mama le reyoʼ tu yuʼubaj u sen juum u tʼaanoʼobeʼ ka ook teʼ túux ku jaanloʼoboʼ. Ka tiaʼalaj tiʼe reyoʼ: Maʼ u maastal u jach jaʼakʼal a wóol. Tumen ta reinoeʼ yaan utúul máak tsʼaʼaban u páajtalil u naʼat tumen le kiliʼich diosoʼoboʼ. Tu kʼiiniloʼob táan u gobernar a abuelo, Nabucodonosoreʼ, tsʼaʼab u beet u nojchil yóokʼol le máakoʼob jach yaan u naʼatoʼoboʼ. U kʼaabaʼeʼ Daniel. Beet u taasaʼal, letiʼeʼ jeʼel u yaʼaliktech baʼax u kʼáat u yaʼal le tsʼíibaʼ.

Tu séebaʼanileʼ taasaʼab Daniel. Ka tsʼoʼok u yaʼalik maʼ táan u chʼaʼik le baʼaxoʼob ku siʼibiltiʼoʼ, ka joʼopʼ u yaʼalik baʼaxten luʼsaʼab u beet u reyil u abuelo Belsasar tumen Jéeoba. Danieleʼ tiaʼalaj: Letiʼ kaʼacheʼ jach nojbaʼal u taaskuba, le beetik luʼsaʼab le reino tiʼ tumen Jéeobaoʼ.

Danieleʼ tiaʼalaj xan tiʼ Belsasar: Techeʼ a wojel xan tuláakal le baʼax úuchoʼ, baʼaleʼ kex beyoʼ láayliʼ nojbaʼal a wuʼuykaba jeʼex Nabucodonosor kaʼacheʼ. Techeʼ ta chʼaʼaj le copaʼob yéetel le nukuch tazaʼob tu templo Jéeobaoʼ yéetel tsʼoʼok u meyajtech utiaʼal a wukʼul. Tsʼoʼok xan a chintal tu táan diosoʼob beetaʼanoʼob yéetel cheʼ bey xan le beetaʼanoʼob yéetel tuunichoʼ, maʼ tsʼáa nojbeʼenil tiʼ le Dios beetmil tuláakal baʼaloʼ. Le oʼolal letiʼeʼ tu beetaj u chíikpajal le kʼab utiaʼal u tsʼíibt le tʼaanoʼobaʼ.

Daniel túuneʼ tiaʼalaj: Le baʼax tsʼíibtaʼanoʼ kiaʼalik MENE, MENE, TEKEL yéetel PARSIN.

MENE, lelaʼ u kʼáat yaʼaleʼ, Dioseʼ tsʼoʼok u pʼisik u kʼiiniloʼob a reino yéetel tsʼoʼok u yaʼalik baʼax kʼiin ken xuʼuluk. TEKEL, lelaʼ u kʼáat yaʼaleʼ, tsʼoʼok u pʼisaʼal a aalil, ka ilaʼabeʼ jach upʼíit a aalil. PARSIN, lelaʼ u kʼáat u yaʼaleʼ, a reinoeʼ yaan u tsʼaʼabal tiʼe medoʼob yéetel tiʼe persaʼoboʼ.

Jach tiʼe súutuk táan u tʼaan Danieloʼ, le medoʼob yéetel le persaʼoboʼ ookoʼob baʼateʼel yéetel le babilonioʼoboʼ, ka tu chʼaʼajoʼob le noj kaajoʼ ka tu kíimsoʼob xan Belsasar. Tiʼe áakʼab túunoʼ, béeychaj le baʼax tsʼíibtaʼab teʼ pakʼoʼ. Beoora túunaʼ, ¿baʼax kun úuchul tiʼe israelitaʼoboʼ? Leloʼ yaan k-kanik tuláakʼ tsikbaliloʼob, baʼaleʼ táanileʼ koʼox ilik baʼax úuch tiʼ Daniel.