¡JAN samti! Danielax jan walin uñjasi. ¡Ukampis leonanakax janiw kuns kamachkitixay! ¿Kunatäpachasa? ¿Leonanak taypir khitis Danielar jaquntpacha? Yatxatañäni.

Darío sat jaqiw Babilonia apnaqxäna. Danielax Darion wali munatänwa kunattix yatiñani suma jaqïnwa, ukatwa Dariox apnaqäwipan Danielar jilïr apnaqirit uttʼayäna. Ukampis yaqha jaqinakaw Danielar uñisipxäna, ukat ak lurapxäna:

Dariomp parliriw sarapxäna ukat akham sapxänwa: ‘Apnaqir tata, taqiniw munapxta, mä akham kamachi apsuñama: 30 urunxa janipuni khitis kuna diosarusa mayispanti, ni kuna jaqirusa jan ukasti juma saparuki Apnaqiri tata mayispan. Uka kamachir jan phuqiriruxa leonanakan uyupar jaquntatäpan’ sasa. Dariox janiw yatkänti kunatsa ukham kamachi munapxäna ukxa. Ukat walïspaw sänwa, ukatwa ukham kamach apsüna. Uka kamachix phuqasipuniñapänwa.

Danielax uk istʼasax utaparuw sarxäna ukanwa Diosar mayisïna kunjamtï lurirïkan ukhama. Uñisirinakapax Jehová Diosat mayisipuniniw sapxänwa. Mayisir uñjasax wal kusisipxäna, Danielax jichhakuchaw jiwanix sasa.

Dariox uka tuqit amuyasïna ukhaxa wal llakisïna. Ukampis kamachix kamachïnwa, phuqasiñapänwa, ukhamasti leonanak taypir jaquntapxañapatakiw Danielar apayäna. Ukampis akham sänwa Danielaruxa: ‘Khiti Diosarutï jumax yupaychkta uka Diosaw qhispiyätam’ sasa.

Dariox wal llakisïna janiw uka arumax ikthapkänti. Qhanjtanxipansti jankʼakiw leonanakan uyupar tʼijüna. Khä patankaskiwa. Akham sasaw artʼanïna: ‘¡Daniel, jakkir Diosan yupaychiripa! ¿Kawkïr Diosarutï yupaychkta ukax leonanakan lakapatxa qhispiytamti?’ sasa.

‘Diosax angelap khitanitayna, jan nayar manqʼantañapatakix jupaw leonanakan lakapsa jistʼanti’ sasaw Danielax säna.

Darion chuymapax qhanartxänwa. Danielar apsunipxam sasaw säna. Ukatxa, Danielar jiwayañ munapkäna uka jaqinakaruwa leonanak taypir jaquntayäna. Janïra manqhar puripkäna ukhaw leonanakax katthapisin wikhanuqapxäna.

Ukat Dariox markpacharuw akham qillqat apayäna: ‘Danielan Diosapar respetapxma. Wali jachʼa milagronak luririwa. Leonanakan lakapat jupaw Danielar qhispiyi’ sasa.