IYEE! Cilemoneka kwati Daniele ali no bwafya ubukalamba. Lelo inkalamo tashilemulya! Bushe nawishiba icilengele? Ni nani apoosele Daniele mu cilindi umwali ishi inkalamo? Natumone.

Pali ilya inshita uwali imfumu ya mu Babiloni ni Dariusi. Alitemenwe sana Daniele pantu Daniele alemucitila ifisuma kabili ali uwa mano. Dariusi alipeeleko Daniele amaka ya kuteka. Ici calengele abaume bambi muli bulya bufumu ukupata Daniele.

E ico baile kuli Dariusi no kumweba ati: ‘Natusuminishanya ukuti Imwe mwe mfumu, mufwile ukupanga ifunde lya kuti, pa nshiku 30, abantu bekapepa lesa uuli onse nelyo umuntu umbi, kano fye imwe mweka, mwe mfumu. Uwakaana ukukonka ili ifunde, alingile ukupooswa mu cilindi ca nkalamo.’ Dariusi taishibe ico balya bantu balefwaila ukuti apange ili ifunde. E ico alitemenwe ifyo balandile kabili alilembele ili ifunde. Ifunde nga balilemba takwali ukulyalula.

Ilyo Daniele aishibe ukuti kwaba ili ifunde, aile mu ng’anda no kupepa, nge fyo alecita lyonse. Balya abaume ababifi balishibe ukuti Daniele te kuti aleke ukupepa kuli Yehova. Balitemenwe pantu balishibe ukuti Daniele ali no kwipaiwa nga fintu balefwaya.

Ilyo Imfumu Dariusi yaishibe ico balya baume balefwaila ukupanga lilya ifunde, yalyumfwile sana ububi. Lelo taya-alwile lilya ifunde. E ico yaebele abaume ukupoosa Daniele mu cilindi ca nkalamo. Lelo imfumu yaebele Daniele ati: ‘Kuti cawama nga ca kuti Lesa obe, uo ubombela akupususha.’

Dariusi alyumfwile sana ububi ica kuti taleele pali bulya ubushiku. Ulucelo aile ku cilindi ca nkalamo ulubilo. E uyu ulemona pa muulu. Abilikishe ati: ‘Daniele, we mubomfi wa kwa Lesa wa mweo! Bushe Lesa uo ubombela nakupususha ku nkalamo?’

Daniele ayaswike ati: ‘Lesa acituma malaika wakwe ukwisala utunwa twa nkalamo, ne nkalamo tashacindya.’

Imfumu yalitemenwe sana. Yaebele abaume ukufumya Daniele mu cilindi. Abaume abalefwaya Daniele afwe, e bo yapoosele mu cilindi ca nkalamo. Inkalamo shalibekete no kukokotaula amafupa yabo yonse ninshi tabalafika na pa nshi ya cilindi.

Lyena Imfumu Dariusi yalembeele abantu bonse abo yaleteka no kubeba ati: ‘Bonse mulingile ukucindika Lesa wa kwa Daniele. Alacita ifipesha amano ifikalamba. Napususha Daniele ku nkalamo, tashimuliile.’