Maana 79nan

Daniɛl bɛ waraba dingɛ kɔnɔ

A BƐ i ko Daniɛl bɛ gɛlɛyaba kɔnɔ. Nka, warabaw tɛ ka kojugu kɛ a la. I b’a dɔn mun na wa? Jɔni de ye Daniɛl bila nin warabaw cɛma? An ka o lajɛ ɲɔgɔn fɛ.

Darius de ye Babilonɛ masakɛ ye sisan. A bɛ Daniɛl fɛ kosɛbɛ, bawo Daniɛl ka ɲi, hakilitigi don fana. Darius ye Daniɛl ta ka a kɛ a ka masayakuntigiw ɲɛmɔgɔ dɔ ye. O y’a kɛ tɔw keleyara Daniɛl la. O de y’a to u ye nin kojugu labɛn Daniɛl kama.

U taara Darius fɛ k’a fɔ a ye ko: ‘Masakɛ, an bɛɛ bɛnna a kan, ko i ka sariya dɔ sigi min b’a fɔ ko tile 30 kɔnɔ, mɔgɔ si man kan ka ala, walima mɔgɔ dɔ deli, fo ni a kɛra e yɛrɛ kelenpe dɔrɔn ye. Ni mɔgɔ dɔ ye o sariya sɔsɔ, o tigi ka fili waraba dingɛ kɔnɔ.’ Darius tun t’a dɔn mun na o cɛw tun b’a fɛ o sariya ka sigi. Nka, Darius fɛ, o sariya tun ye hakilila ɲuman ye. O kosɔn, a ye o sariya sɛbɛn. O sariya  tun tɛ se ka yɛlɛma cogo si la tuguni.

Daniɛl y’a mɛn tuma min na dɔrɔn ko o sariya bɔra, a taara a ka so, ka Ala deli i ko a tun bɛ deli ka o kɛ cogo min na. Daniɛl juguw tun b’a dɔn ko Daniɛl tun tɛna Jehova delili dabila. U nisɔndiyara bawo u ye fɛɛrɛ min tigɛ walisa ka Daniɛl bɔ yen, a bɛ ikomi o fɛɛrɛ tun bɛ ka ɲɛ.

O cɛw tun b’a fɛ o sariya ka sigi kun min na, masakɛ Darius ye o dɔn tuma min na, a dusu kasira kosɛbɛ. Nka, a tun tɛ se tuguni ka sariya yɛlɛma. O kosɔn, a y’a fɔ ko Daniɛl ka fili waraba dingɛ kɔnɔ. Nka, masakɛ ko Daniɛl ma: ‘I bɛ Ala min bato, o na i kisi.’

Darius dusu tiɲɛna kosɛbɛ fo a ma se ka sunɔgɔ o su. Dugu jɛra tuma min na, a bolila ka taa waraba dingɛ da la. I ɲɛ bɛ ale de la yan yɔrɔ la. A pɛrɛnna k’a fɔ ko: ‘Daniɛl, Ala ɲɛnama batobaga! I bɛ baara kɛ Ala min ye, o sera k’i kisi ka bɔ warabaw da wa?’

Daniɛl y’a jaabi ko: ‘Ala ye a ka mɛlɛkɛ ci ka na warabaw daw siri walisa u kana se ka kojugu kɛ ne la.’

Masakɛ nisɔndiyara kosɛbɛ. A ko Daniɛl ka sama ka bɔ dingɛ kɔnɔ. Mɔgɔjugu minnu y’a ɲini ka Daniɛl bɔ yen, masakɛ y’a fɔ u ka olu fili warabaw ma. Sani o mɔgɔjuguw ka se dingɛ dan na dɔrɔn, warabaw ye u minɛ, k’u kolow bɛɛ kari-kari.

Masakɛ Darius tilala ka nin kumaw sɛbɛn k’a lase a ka jamana kɔnɔmɔgɔw bɛɛ ma. A ko: ‘Ne b’a wajibiya ko mɔgɔ bɛɛ ka Daniɛl ka Ala bonya. A bɛ kabakobaw kɛ. A ye Daniɛl kisi ka bɔ warabaw da.’

Daniɛl 6:​1-28.