AW,AW! Daniel cu harnak nganpi a phan mi a lo. Asinain chindeih nihcun amah cu harnak an pe lo! Zeicah ti nan hngal maw? Hi chindeih hna sin ah hin Daniel cu aho nih dah a thlak? Zoh hmanh u sih.

Atu i Babilon siangpahrang cu Darius an ti mi pa a si. Daniel cu a fim i zangfahnak a ngeih caah Daniel kha a dawt ngaingai. Darius nih Daniel cu a pennak chung i bawi ngan bik ah a thim. Cucaah ram chung i midang nih Daniel cu an nahchuah i, hi bang in an tuah mi a si.

Darius sin ah an kal i: ‘Maw siangpahrang, nangmah siangpahrang sin ah dah ti lo in cun ahohmanh nih zei pathian le aho minung sin hmanh ah ni 30 chung thla cam hna hlah seh tiah nawlbia pakhat na chuah awk ah kan hna a tla dih. A zul lo mi paoh cu chindeih thong chung ah thlak si seh,’ tiah an chimh. Hi mi hna nih zeicahdah hi nawlbia tuah an duh ti kha Darius nih a hngal lo. Sihmanhsehlaw a ṭha mi ruahnak a si tiah a ruah i, nawlbia cu a ṭial i a fehter. Nawlbia cu let khawh a si ti lo.

Daniel nih khi nawlbia kong a theih tik ah, inn ah a ṭin i, a tuah tawn bang in thla cu a cam. Khi mi ṭhalo hna nihcun Daniel nih Jehovah sin thlacam cu a ngol lai lo ti an hngalh ko. Daniel hloh awk an ruahnak cu a tling cang lai tiah an ruah caah an i lawm ngaingai.

Hi mi hna nih cu nawlbia cu zeicahdah tuah an duh ti kha Siangpahrang Darius nih a hngalh tik ah a ngaih a chia ngaingai. Sihmanhsehlaw nawlbia cu a thleng ṭhan kho ti lo. Cucaah Daniel kha chindeih thong chung thlak awk nawl a pek hna. Asinain siangpahrang nih Daniel cu: ‘A rian na ṭuan zungzal mi na Pathian nih an khamh ko lai tiah kaa ruahchan,’ tiah ati.

Darius cu a awlok a chawng tuk i cu zan cu aa hngilh kho lo. A thai zing cu chindeih thong lei cu a va tli. Amah cu khika khin nan hmuh khawh. ‘Daniel, a nung mi Pathian salpa! A rian na ṭuan mi Pathian nih chindeih hna sin khan an khamh kho maw?’ tiah a auh.

‘Pathian nih a vancungmi kha a run thlah i chindeih an ka kha a phih hna caah harnak zeihmanh an ka pe lo,’ tiah Daniel nih a hun leh.

Cutikah siangpahrang cu aa lawm ngaingai. Daniel cu khor chung in chuah u tiah nawl a pek hna. Cu hnu ah Daniel hloh a rak tim mi miṭhalo hna kha chindeih thong chung ah a thlakter hna. A ṭuang hmanh an phak hlan ah chindeih nihcun an zuanhnawh hna i an ruh vialte zong an khai dih hna.

Cuhnu ah Siangpahrang Darius nih a pennak chung i mi vialte sin ah: ‘Mikip nih Daniel a Pathian cu upat ko hna seh tiah nawl ka pek. Daniel a Pathian nihcun khuaruahharnak nganpipi a tuah khawh. Daniel zong kha chindeih hna einak in a khamh cang,’ tiah ca a kuat hna.