I PARET ki Danyel i dan en ta problenm. Me sa bann lyon pa pe fer li nanryen! Eski ou konnen akoz? Lekel ki’n met Danyel la avek sa bann lyon? Annou vwar.

Aprezan lerwa Babilonn ti apel Daris. I ti kontan Danyel en kantite akoz i ti en bon dimoun e i ti malen. Daris ti swazir Danyel pour vin en sef dan son rwayonm. Sa ti fer lezot zonm dan rwayonm zalou Danyel, alor gete ki zot ti fer.

Zot ti al kot Daris e zot ti dir li: ‘Nou tou nou’n dakor, O lerwa, ki ou devret fer en lalwa ki dir ki pour 30 zour personn pa devret priy avek okenn bondye oubyen zonm eksepte ou, O lerwa. Si okenn dimoun i dezobei, alor i devret ganny zete dan en trou ki annan lyon.’ Daris pa ti konnen akoz ki sa bann zonm ti oule fer sa lalwa. Me i ti panse ki ti en bon lide, alor i ti fer ekrir sa lalwa. Aprezan sa lalwa pa ti kapab sanze.

Kan Danyel ti antann konsernan sa lalwa, i ti al kot li e i ti priye, zis parey i ti abitye fer. Sa bann move zonm ti konnen ki Danyel pa ti pou aret priy Zeova. Zot ti kontan, akoz i paret ki zot plan pour debaras zot avek Danyel ti pe marse.

Kan lerwa Daris ti konnen akoz ki sa bann zonm ti anvi fer sa lalwa, i ti vreman regrete. Me i pa ti kapab sanz sa lalwa, alor i ti donn lord ki Danyel i ganny zete dan trou avek bann lyon. Me lerwa ti dir avek Danyel: ‘Mon swete ki ou Bondye ki ou servi, pou sov ou.’

Daris ti vreman trakase ki sa swar i pa ti kapab dormi. Lannmen bomaten i ti tay kot trou ki ti annan bann lyon. Ou kapab vwar li la. I ti kriye: ‘Danyel, serviter Bondye vivan! Eski sa Bondye ki ou servi in kapab sov ou avek bann lyon?’

‘Bondye in anvoy son lanz,’ Danyel ti reponn, ‘e i’n ferm labous sa bann lyon afen ki zot pa kapab manz mwan.’

Lerwa ti vreman kontan. I ti donn lord pour retir Danyel dan sa trou. Apre i ti fer zet bann zonm ki ti oule touy Danyel dan trou kot sa bann lyon ti ete. Zot pa ti ankor ariv anba dan trou nek bann lyon ti sot lo zot e kas tou zot lezo.

Apre lerwa Daris ti ekrir tou dimoun dan son rwayonm: ‘Mon donn sa lord ki tou dimoun i devret respekte Bondye Danyel. I fer bann gran mirak. I’n anpes bann lyon manz Danyel.’