¡BE DAGGE! Daniel leónmar abargi gwissi. ¡Boni bibbigwaye! ¡Auggi leónmar gwen aggar Daniel imagsurmala! ¿Be wisi ibigala? ¿We doa Daniel odosa leónmar abargi? Anmar daggoena.

Emisgindi Babiloniag rey negdagmaid nuga Darío. We reydi nued Danielgi binsae, ar Danieldi dule nued dasoggua geb dule yeer ibmar wisid gubar soggua, agala Darío e reinogi dummadga Daniel onugsasa, negdagmai guega. Auggi dule bamaladi Danielgi nobguarmala, geb ibmar soggwen imasmala.

Daríos nadmala geb sogdabmala: ‘Reyye, bela anmar abegedbii, be igar mesedi, 30 días gine dule wargwensaale babdummad baidse golosurye, babdummadyob melle dulemarse gormarbaloye, unnila be nugbii odummolegoye. Dule wargwen we igar sogedba igar imassulile, leónmar buggwad abarse mellenaoye’. Daríodi wissuli ibigala we dulemar deyob igar mesbimala. Deginigwale, ega igar nued gumoga, degsoggua, deyob igar mesisa. Emisgi igar megisadi, geg bar ogwalege.

Daniel we igar megisad wisgunonigu, na negse nade Babdummad sega golega, igi na iduale imagdi gudae. Dulemar isganamardina wismalanad Daniel, Jehová sega goled indaggosulina. Degsoggu yeeriddomalad, ar binsamalad emisgindi Daniel anmarse obelolessunye.

Darío magiddoargua, igi ibmar imaglenai, wileiddoalid. Auggi geg bar igar megisad ogwaleged, degsoggu soge daglearsunna, Daniel, leónmar buggwadse mellenaoye. Auggi Danielga rey soge: ‘Biddiggi Babdummad ega be arbadiidi, be bendasan gadina’.

Darío sulisuli iddoge, aa muddiggi gabsur guali. Oibosgu, gwae abarmade leónmar buggwad negse. Be daggena, addagnaid. Geb binnasur Danielse godde: ‘¡Daniel, Babdummad dula maidga arbaed! ¿Leónmarse be gullessuli? ¿Be Babdummad ega be arbadiidi, un be bendasa?’.

‘Babdummad na e ángel barmiali’, Daniel abinsoge, ‘geb bela leónmar gagga maggagwale buggwa imasa, mer an gunmalaga’.

Rey yeeriddoge. Geb sogsa gwae Daniel onomaloye. Degi Daniel mudsubbi, agga Daniel oburgwebi gusmalad egwallesmala leónmar abargi. We dulemar anba yoo nabbas argwanmala, bad leónmar egi alamagdemala, geb bela e garmar ei ber oubimadmala.

Degiidgi, rey Darío bela e neggweburga garda mimisa: ‘Daniel e Babdummad maidgi mer dodomaloye. Wedi ibmar dagledisulid nabir imagged. Daniel bendasad, mer leónmarse gullegega’.