MADI! Toana be Daniela be hekwakwanai bada herea ia davaria. To laiona ese ia idia haberoa lasi! Ena badina oi diba, a? Daika ese Daniela ia atoa inai laiona ibounai danu? Mani ita itaia.

Hari Babulonia ena king be Dariuse. Daniela ia ura henia bada badina Daniela be hebogahisi bona aonega tauna. Dariuse ese Daniela ia abia hidi ena basileia ena lohia badana ai ia lao totona. Unai dainai basileia lalonai idia noho tatau haida idia mama, bona unai kara idia karaia.

Dariuse dekenai idia lao bona idia gwau: ‘King e, ai ibounai ai lalo-tamona, ai ura oi ese taravatu ta oi karaia, oi gwau dina 30 lalodiai ta lasi ese dirava eiava taunimanima ta do idia guriguri henia lasi, to oi sibona. Bema ta ia kamonai lasi, laiona edia guri lalonai do ita negea.’ Dariuse be inai taravatu ena badina ia diba lasi. To ia laloa unai be lalohadai namona, unai dainai ia torea. Hari taravatu idia haidaua diba lasi.

Daniela be unai taravatu ia dibaia neganai, ruma dekenai ia giroa bona ia guriguri, hanaihanai ia karaia bamona. Unai kara dika tatau idia diba Daniela ese Iehova guriguri henia karana do ia hadokoa lasi. Idia moale badina idia laloa Daniela hamasea totona idia karaia palanina ia gaukara.

King Dariuse be taravatu ena badina ia dibaia neganai, ia lalohisihisi bada. To taravatu ia haidaua diba lasi dainai, ia haganidia Daniela be laiona edia guri lalonai do idia negea. To king ese Daniela ia hamaoroa: ‘Lau ura oi tomadiho henia Diravana ese oi do ia hamauria.’

Dariuse ia lalo-hekwarahi bada dainai, unai hanuaboi ai ia mahuta diba lasi. Murina dinana ai laiona edia guri dekenai ia heau lao. Laulau dekenai ia oi itaia diba. Ia boiboi: ‘Daniela e, mauri Diravana ena hesiai tauna e! Oi hesiai henia Diravana ese oi ia hamauria, eiava?’

Daniela ia haere: ‘Dirava ese ena aneru ia siaia bona laiona edia uduna ia koua. Unai dainai lau idia hadikaia lasi.’

King ia moale momokani. Ia haganidia Daniela be guri amo idia abia daekau. Bena Daniela idia hamasea toho taudia dikadia be laiona ena guri lalonai idia negea. Idia moru noho lalonai, maoromaoro laiona ese idia koridia bona edia turia idia hamakohidia.

Bena King Dariuse ese ena basileia taudia ibounai ia tore henidia, ia gwau: ‘Namona be umui ibounai ese Daniela ena Dirava do umui matauraia. Hoa karadia ia karaia. Daniela ia hamauria laiona edia amo.’