E E, YU yu mu. Daniela gaw kyin dut hkrum sai. Raitimung hkanghkyi ni shi hpe n ka wa ai. Hpa majaw re ai hpe chye a ni? Ndai hkanghkyi nhkun de Daniela hpe kadai jahkrat bang dat a ta? Anhte yu yu ga.

Ya Babelon hkawhkam gaw Dari ngu ai wa re. Daniela hpe shi grai tsaw ra ai. Daniela gaw myit kaja ai. Hpaji mung rawng ai. Dari gaw Daniela hpe shi a mungdan hta ningtawn ningla shara hta san tawn da ai. Dai majaw kaga masha ni gaw Daniela hpe manawn nna, shanhte ndai hku galaw dat ma ai.

Shanhte gaw Dari hkawhkam kaw sa nna: ‘Hkawhkam wa e, nang hta lai nna kaga karai hte, gara masha wa kaw mung nhtoi 30 ya a laman e, kadai mung akyu hpyi lu na nrai. N madat ai wa hpe hkanghkyi nhkun hta jahkrat bang kau lu na re, ngu ai tara hpe shapraw na matu anhte yawng myit hkrum saga ai,’nga nna hpyi jashawn ma ai. Ndai tara hpe hpa majaw shapraw mayu ai lam hpe Dari gaw n chye ai. Raitimung kaja ai tara rai na zawn nawn nna, dai tara hpe ka nna shagrin dat ai. Ya gaw dai tara hpe nmai galai sai.

Daniela gaw dai tara hpe na jang nta de wa nna, shawng na hte naren, akyu hpyi ai. Nhkru ai masha ni gaw, Daniela Yehowa kaw akyu nhpyi ai gaw n nga na re ai hpe, chye ma ai. Daniela hpe yeng kau lu na matu, shanhte yaw shada da ai lam awng dang na zawn nawn nna kabu nga ma ai.

Ndai masha ni gaw hpa majaw ndai tara hpe shapraw mayu ma ai lam, Dari hkawhkam chye wa ai shaloi, grai yawn kau ai. Raitimung tara hpe shi nmai galai kau sai. Dai majaw Daniela hpe hkanghkyi nhkun hta jahkrat bang kau na matu, ahkang jaw dat ai. Raitimung hkawhkam wa gaw: ‘Daniela nang nawku ai Karai Kasang gaw, nang hpe hkye la u ga,’ nga nna Daniela hpe tsun ai.

Dari gaw dai shana e, grai myit npyaw nna n lu yup ai. Hpang jahpawt e, shi a hkanghkyi nhkun de kagat sa wa ai. Shi hpe htaw ra kaw mu lu ai. Shi gaw hkrap ai nsen hte, ‘Ahkrung nga ai Karai Kasang a shangun ma Daniela e, Nang nawku ai Karai Kasang gaw nang hpe hkanghkyi a n-gup na hkye la lu a ni?’ nga nna san ai.

Daniela gaw, ‘Karai Kasang shi a lamu kasa hpe shangun dat nna hkanghkyi ni a n-gup hpe pat da ai. Dai majaw ngai hpe n kawa ma ai,’ nga nna bai htan ai.

Hkawhkam wa gaw grai kabu nu ai. Daniela hpe nhkun kaw na shaw la mu, nga nna hkang dat ai. Bai nna Daniela a ntsa e, myit magaw rawng ai nshawp ai masha ni hpe hkanghkyi nhkun hta jahkrat bang shangun ai.Dai ni gaw nhkun htum pa pyi rai ndu yang, hkanghkyi ni hkap kawa amya sha nna, n rut nra yawng hpe kawa agrawp sha kau ai.

Bai nna Dari gaw shi a mung masha ni yawng hpang de, laika ka shana dat ai: ‘Masha yawng Daniela a Karai Kasang hpe hkungga kam sham lu na matu ngai hkang dat ai. Shi a Karai Kasang gaw mauhpa kumla kaba madun dan lu ai. Daniela hpe hkanghkyi ni nsha lu hkra mawai la lu ai.’