LAJ Daniel wank saʼ xyanqebʼ li kaqkoj. Kʼaʼut maakʼaʼ nekeʼxbʼaanu re laj Daniel? Kʼaʼut wank saʼ xyanqebʼ li kaqkoj? Ani kikʼehok re laj Daniel aran?

Anaqwan laj Dario yook chi awabʼejink saʼ li tenamit Babilonia. Laj Dario naxra laj Daniel, xbʼaan naq chaabʼil ut wank xnaʼlebʼ. Kixkʼe laj Daniel chi jolomink saʼ li xʼawabʼejilal. Ma nakaanaw kʼaru keʼxbʼaanu re laj Daniel xbʼaan naq inkʼaʼ saʼ nekeʼril?

Ebʼ li winq kohebʼ rikʼin laj Dario ut keʼxye re: ‹Naqaj jun li chaqʼrabʼ bʼarwiʼ tixye naq chiru 30 kutan, maajun winq ttijoq chiru junaq yos malaj winq, kaʼajwiʼ chaawu, at awabʼej! Li tqʼetoq re li chaqʼrabʼ aʼin, tkutmanq saʼ xyanqebʼ li kaqkoj›. Li awabʼej inkʼaʼ naxnaw kʼaʼut ebʼ li winq teʼraj li chaqʼrabʼ aʼin. Abʼan kiwulak chiru li keʼxye re, joʼkan naq kixtzʼiibʼa li chaqʼrabʼ. Li chaqʼrabʼ aʼin, moko naru ta chik xjalbʼal.

Naq laj Daniel kixnaw aʼin, xko chi tijok saʼ rochoch joʼ naxbʼaanu chi rajlal. Ebʼ li xikʼ nekeʼilok re, nekeʼxnaw naq laj Daniel inkʼaʼ tixkanabʼ tijok chiru li Jehobʼa. Keʼsahoʼk saʼ xchʼool, xbʼaan keʼxkʼoxla naq teʼruuq xkamsinkil laj Daniel.

Li awabʼej kirahoʼk saʼ xchʼool naq kixkʼe reetal li teʼraj xbʼaanunkil re laj Daniel. Abʼan inkʼaʼ chik kiru xjalbʼal li chaqʼrabʼ, joʼkan naq kixtaqla laj Daniel saʼ xyanqebʼ li kaqkoj. Li awabʼej kixye re laj Daniel: ‹Aʼ taxaq laaYos taakoloq aawe!›

Laj Dario inkʼaʼ kiwark chi xkʼoxlankil laj Daniel. Naq kisaqewk xko rilbʼal laj Daniel saʼ xnaʼajebʼ li kaqkoj, joʼ nakʼutunk saʼ li eetalil. Tojaʼ naq kixye re: ‹At Daniel, ma xatxkol li Nimajwal Yos, Jehobʼa, chiruhebʼ li kaqkoj?›

Laj Daniel kixye: ‹Li Yos kixtaqla li xʼanjel re naq maakʼaʼ teʼxbʼaanu we ebʼ li kaqkoj›.

Naq li awabʼej kirabʼi xkux laj Daniel, kisahoʼk saʼ xchʼool ut kixtaqla risinkil. Tojaʼ naq kixkutebʼ li xikʼ nekeʼilok re laj Daniel saʼ xyanqebʼ li kaqkoj. Toj maajiʼ nekeʼtʼaneʼk li winq saʼ xyanqebʼ li kaqkoj naq keʼtʼupiik xtibʼel.

Chirix chik aʼan, laj Dario kixkʼe jun li chaqʼrabʼ re li xtenamit: ‹Cheeroxloqʼi ut cheepaabʼ li xYos laj Daniel, li Yos aʼin naxbʼaanu li sachbʼachʼoolej ut kixkol laj Daniel chiruhebʼ li kaqkoj›.