OH, OH! Yau kemonana nde Daniel kele na kati ya mpasi. Kansi bankosi yonso ketala yandi kaka na meso! Keti beno kezaba sambu na nki? Nani mekotisa Daniel na kati ya bankosi? Beto tala mpila mambu kulutaka.

Ntangu yai, Darius mekuma ntotila ya Babilone. Yandi zolaka mingi Daniel sambu Daniel vandaka muntu ya ngangu mpi ya mbote. Darius solaka Daniel bonso mfumu na kati ya bamfumu yankaka na kintinu na yandi. Kansi bantu kuwilaka Daniel kimpala sambu na mambote na yandi.

Bamfumu yina kwendaka na Darius mpi tubilaka yandi nde: ‘Beto kezola nde nge kubaka nsiku ya ngolo yina fwete buyila bantu yonso, na bilumbu 30, na kusambila banzambi yankaka to muntu yankaka, kansi kaka nge, kana muntu kuzitisa nge ve beto talosa yandi na dibulu ya bankosi.’ Darius vandaka kuzaba ve bangindu na bau ya mbi mpi yandi tulaka diboko na nsiku yina. Na yau, nsiku yina fwanaka kusobana dyaka ve.

Ntangu Daniel waka nde nsiku ya mpa mebasika, yandi kwendaka na nzo na yandi mpi yantikaka na kusamba mutindu yandi vandaka kusala konso ntangu. Bambeni na yandi zabaka nde yandi tafula kaka na kusambila Jéhovah. Bau vandaka na kyese, sambu bau monaka bonso nde bangindu na bau tasalama.

Ntangu Ntotila Darius zabaka sambu na nki bamfumu yina zolaka kubasisa nsiku yina, yandi waka ntantu mingi. Bonso yandi lungaka dyaka ve kusoba nsiku yina, ntotila pesaka nswa na kulosa Daniel na dibulu ya bankosi. Kansi, ntotila tubaka na Daniel nde: ‘Nzambi ya nge kesambilaka, kugulusa nge yandi mosi.’

Darius monaka mpila ya kulala ve na mpimpa yina sambu mabanza na yandi vandaka kisakasaka. Kilumbu ya kulanda na suka, yandi kwendaka ntinu na dibulu ya bankosi. Keti beno kemona yandi ya kutelema na zulu ya dibulu? Yandi bokaka nde: ‘Daniel, nsadi ya Nzambi ya moyo! Keti Nzambi na nge megulusa nge na minoko ya bankosi?’

Daniel vutudilaka yandi nde: ‘Nzambi tindaka wanzyo na yandi, yandi mekangisa minoko ya bankosi, mpi bau mesala mono kima ya mbi ve.’

Na kuwaka mutindu yina, ntotila waka kyese mingi. Yandi tindaka bantu sambu na kubasisa Daniel na dibulu mpi tubaka na kulosa bamfumu yonso yina fundaka Daniel na dibulu yina. Bau kumaka na nsi ya dibulu ve ya bankosi yambaka bau mpi bukaka mikwa na bau.

Na nima, Ntotila Darius sonikaka mambu yai na bantu yonso ya kintinu na yandi: ‘Mono kepesa nswa na bantu yonso na kuzitisa Nzambi ya Daniel. Yandi kesalaka bimpa ya ngolo. Yandi megulusa Daniel na manzungulu ya bankosi.’