ĨYIAA-Ĩ! Kũronekana Danieli arĩ ũgwati-inĩ mũnene mũno. No ĩndĩ mĩrũthi ndĩramũhutia! Nĩ ũũĩ gĩtũmi nĩ kĩĩ? Nũũ ũikĩtie Danieli gũkũ mĩrũthi-inĩ? Ta tiga tũmenye.

Mũthamaki wa Babuloni rĩu nĩ mũndũ wĩtagwo Dario. Nĩ endete Danieli mũno tondũ Danieli aarĩ tha na ningĩ mũũgĩ. Dario aathurĩte Danieli atuĩke mwathani ũrĩa mũnene thĩinĩ wa ũthamaki wake. Ũndũ ũyũ nĩ watũmire andũ amwe thĩinĩ wa ũthamaki maiguĩre Danieli ũiru, na ũũ nĩguo mekire.

Maathire kwĩ Dario makĩmwĩra ũũ: ‘Tũciranĩire tũgatua atĩ kwagĩrĩire wee, mũthamaki, ũtue watho na ũhinge mũhingo atĩ hĩndĩ ya matukũ 30 gũtirĩ mũndũ o na ũmwe wagĩrĩirũo nĩ kũhoya ngai ĩngĩ kana mũndũ tiga o wee, mũthamaki. Mũndũ o na ũrĩkũ angĩaga gwathĩka, no nginya aikio irima-inĩ rĩa mĩrũthi.’ Dario ndaamenyire gĩtũmi kĩa andũ acio gũthondekithia watho ũcio. We eeciririe atĩ nĩ ũndũ mwega, kwoguo agĩkĩandĩkithia watho ũcio. Na rĩu watho ndũngĩgarũrwo.

Rĩrĩa Danieli aamenyire ũhoro wa watho ũcio-rĩ, aathire mũciĩ na akĩhoya, o ta ũrĩa aamenyerete. Andũ acio oru nĩmaamenyaga atĩ Danieli ndangĩatigire kũhoya Jehova. Nĩmaakenire, tondũ nĩmonire ta mũbango wao wa kũnina Danieli nĩ ũkũhinga.

Rĩrĩa Mũthamaki Dario aamenyire gĩtũmi kĩa andũ acio gũthondeka watho ũcio, akĩigua kĩeha mũno. No ndangĩahotire kũgarũra watho, na rĩu agĩkĩheana watho Danieli aikio irima-inĩ rĩa mĩrũthi. No ĩndĩ mũthamaki akĩĩra Danieli atĩrĩ: ‘Ngai waku ũrĩa ũtungatagĩra hingo ciothe-rĩ, nĩegũkũhonokia.’

Dario aangaĩkire ũtukũ wothe ndaigana gũkoma. Rũcinĩ rũrũ rũngĩ agĩteng’era irima-inĩ rĩa mĩrũthi. Ta muone mbica-inĩ. Eetanire na mũgambo mũnene: ‘Ĩ Danieli-ĩ, wee ndungata ya Ngai ũrĩa wĩ muoyo! Ngai waku ũrĩa ũtungatagĩra hingo ciothe nĩahotete gũkũhonokia harĩ mĩrũthi hihi?’

Danieli aamũcokeirie ũũ, ‘Ngai wakwa nĩarandũmĩire mũraika wake, arahinga mĩrũthi tũnua, nayo ndĩnjĩkĩte kaũndũ.’

Mũthamaki nĩacanjamũkire ngoro mũno. Agĩathana atĩ Danieli arutwo irima rĩu rĩa mĩrũthi. Ningĩ agĩathana atĩ andũ acio oru arĩa mendaga kũnina Danieli maikio irima-inĩ rĩa mĩrũthi. O na matakinyĩte gĩtina kĩa irima-rĩ, maarĩ ahehenje nĩ mĩrũthi ĩo.

Nake Mũthamaki Dario akĩandĩkĩra andũ othe thĩinĩ wa ũthamaki wake akiuga: ‘Ndathana atĩ o mũndũ wothe ainainage mbere ya Ngai wa Danieli. Aringaga ciama nene. Aahonokirie Danieli ndakarĩo nĩ mĩrũthi.’