MAMA! Kibena kumwekana nobe Danyela uji bingi mu lukatazho. Bino mabokwe kechi abena kumuja ne! Nanchi wayuka ene mambo nyi? Ñanyi watayile Danyela mu ano onse mabokwe? Twaya tumone.

Mfumu wa bena Babilona pa kyokya kimye wajinga Daliusa. Wamutemenwe bingi Danyela mambo Danyela wajinga bingi na lusa kabiji ne na maana. Daliusa wasajile Danyela kwikala kinemanga mukatampe mu bufumu bwanji. Kino kyalengejile banabalume bakwabo mu bufumu kumvwina Danyela kichima. Abino byo byo baubile.

Bayile kwi Daliusa ne kumwambila’mba: ‘Anweba mfumu, twaumvwañana’mba, mulenge muzhilo wa kuba’mba, mu moba 30 kafwako wafwainwa kulomba kintu kwi lesa ungi nangwa ku muntu ne, poso kwi Anweba mfumu yenka. Umvwe muntu wabula kukokela, wafwainwa kutayiwa mu jiyengo pamo na mabokwe.’ Daliusa kechi wayukile ene mambo bano banabalume o bakebejilenga uno muzhilo kulengwa ne. Pano bino, wamwene’mba mulanguluko ujitu bulongo, onkao mambo wamuswishishe. Uno muzhilo kechi wakonsheshe kupimpulwa ne.

Danyela byo ayukile’mba muzhilo walengwa, wayile mu nzubo yanji na kulomba byonka byo akelwanga kuba bimye byonse. Aba banabalume batamine michima bayukile’mba Danyela kechi ukaleka kulomba kwi Yehoba ne. Batemenwe bingi mambo kyamwekele amba mulanguluko wabo wa kwipaya Danyela waingijilenga.

Mfumu Daliusa byo aishile kuyuka ene mambo bano banabalume o bakebejilenga amba uno muzhilo alengwe, kyamukolele bingi ku muchima. Bino kechi wakonsheshe kupimpula muzhilo ne. Onkao mambo, wakambizhe’mba Danyela atayiwe mu jiyengo ja mabokwe. Bino nangwa byonkabyo, mfumu waambijile Danyela amba: ‘Naketekela’mba Lesa wobe ye wingijila usakukupulusha.’

Daliusa waumvwine bibi ku muchima kabiji bufuku tulo twamupalañene pa meso. Lukelokelo mfumu wayile lubilo ku jiyengo ja mabokwe. Awe uji pa kikye kipikichala. Wabijikile na jiwi ja bulanda amba: ‘Danyela, kalume wa Lesa mumi! Aye Lesa wobe ye wingijila waji kukonsha kukupokolola ku mabokwe nyi?’

Danyela wakumbwile’mba: ‘Lesa waji kutuma malaika wanji ne kushinka tunwa twa mabokwe, ne ao ne kunkozhapotu ne.’

Mfumu waikele bingi na lusekelo. Wakambizhe’mba Danyela bamufumyemo mu jiyengo. Ponkapo, wakambizhe’mba aba banabalume bakebelenga kwipaya Danyela bebataye mu mabokwe. Ne kya kine bebatailemo, pano bino saka bakyangyetu ne kufika panshi ya jiyengo ne, mabokwe ebakwachile ne kumokaula bikupa byabo byonse.

Kabiji Mfumu Daliusa wanembejile bantu bonse ba mu bufumu bwanji amba: ‘Nakambizha namba muntu yense wafwainwa kumwakamwa Lesa wa Danyela. Uba bya kukumya bikatampe. Wapokolwele Danyela mu tunwa twa mabokwe.’