LUK na di pikchɔ. Daniɛl de usay layɔn dɛn de. Bɔt di layɔn dɛn nɔ de du am natin. Yu no wetin mek? Na udat put Daniɛl naya? Lɛ wi si.

Di kiŋ we de rul naw na Babilɔn, na wan man we nem Dayrɔs. Dis kiŋ lɛk Daniɛl bad bikɔs Daniɛl na gud man, ɛn i gɛt sɛns. So i mek Daniɛl bi wan pan di tri bigman dɛn we de oba di ɔda bigman dɛn na in kiŋdɔm. Dis mek di ɔda man dɛn na di kiŋdɔm bigin jɛlɔs Daniɛl. So yu no wetin dɛn man ya du?

Dɛn go to Dayrɔs ɛn tɛl am se: ‘Kiŋ, wi want lɛ yu mek wan lɔ se, fɔ 30 dez, nɔbɔdi nɔ fɔ pre to ɔda gɔd ɔ ɔda pɔsin pas to yu nɔmɔ. Ɛnibɔdi we nɔ du wetin dis lɔ se, dɛn fɔ put am insay di ol usay di layɔn dɛn de.’ Dayrɔs nɔ bin no wetin mek dɛn man ya kam tɛl am fɔ mek dis lɔ. Bɔt i tink se na fayn tin, so i mek di lɔ. Ɛn we yu si i dɔn mek di lɔ so, nɔbɔdi nɔ go ebul chenj am igen.

We Daniɛl no bɔt di lɔ, i go na os ɛn pre. Na so i kin du ɔltɛm. Dɛn bad man ya no se Daniɛl nɔ go lɛf fɔ pre to Jiova. Dɛn gladi bikɔs dɛn fil se wetin dɛn want du to Daniɛl de kam bi.

We Kiŋ Dayrɔs no wetin mek dɛn man ya tɛl am fɔ mek di lɔ, i fil bad. Bɔt i nɔ go ebul chenj di lɔ igen, so i jɔs gɛt fɔ mek dɛn put Daniɛl insay di ol usay di layɔn dɛn de. Bɔt di kiŋ tɛl Daniɛl se: ‘A op se yu Gɔd we yu de sav go sev yu.’

Dayrɔs kɔnfyus ɛn dat mek i nɔ ebul slip da nɛt de. Na mɔnin, i rɔn go na di ol usay di layɔn dɛn de. Na Dayrɔs yu de si ɔp yanda so na di pikchɔ. I ala to Daniɛl se: ‘Daniɛl, yu pawaful Gɔd we nem Jiova bin ebul sev yu?’

Daniɛl ansa am se: ‘Gɔd sɛn in enjɛl fɔ lɔk di layɔn dɛn mɔt, so di layɔn dɛn nɔ du mi natin.’

Di kiŋ gladi bad. I mek dɛn pul Daniɛl insay di ol. Dɔn i mek dɛn put di man dɛn we bin de plan bad fɔ Daniɛl, insay di layɔn dɛn ol. Bifo dɛn rich dɔŋ di ol, di layɔn dɛn jomp pan dɛn ɛn bigin it dɛn.

Dɔn Kiŋ Dayrɔs tɛl ɔl di pipul dɛn na in kiŋdɔm se: ‘Ɔlman fɔ rɛspɛkt Daniɛl in Gɔd. Na Gɔd we de du wɔndaful tin dɛn. I mek di layɔn dɛn nɔ du Daniɛl natin.’