AYE, AYE! Kuna kumoneka asi Ndaniyera kuna kara moudigu wounene. Nye vanyime kapi vana kumuguma! Ono diva asi morwasinke? Yilye ogu ga tulire Ndaniyera omu movanyime navenye ava? Tu tareni.

Ngesi hompa gwaBabironi kuna kara mugara gedina Daliusi. Age kwa hara Ndaniyera unene morwa Ndaniyera munambili ntani munandunge. Daliusi ta horowora Ndaniyera a kare mukurona govapangeli mouhompa wendi. Eyi tayi ninki vagara vamwe womouhompa va pakere Ndaniyera mfudu, makura eyi yiyo nye vana rugana.

Tava zi kwa Daliusi nokumutantera asi: ‘Hompa, ose kuna lizuvhu asi ove o ture po mpangera zokutanta asi momazuva 30 kwato ogu na kanderera kwankenye karunga ndi muntu ntudi koge ove hompa. Nkenye ogu na dina mpangera ezi va kona kumuzugumina movanyime.’ Daliusi kapi ana diva asi morwasinke vagara ava va harere asi veta ezi va zi ture po. Nye age ta gazara asi eli egano lyewa, makura ta tura veta ezi patjangwa. Ngesi veta nokuvhura si hena kuzipirura.

Ndaniyera apa ana zuvhu veta, ta zi kembo nokukanderera, ngomu nga rugana nkenye apa. Vagara wovadona va divire asi Ndaniyera kapi na hageka kukanderera kwaJehova. Awo vana hafa, morwa ayo kuna kumoneka asi egano lyawo lyokugusa po Ndaniyera kuna kugenda.

Hompa Daliusi apa ana zuvhu asi morwasinke vagara ava va harerere kutura po veta ezi, ta livere unene. Nye age kapi ta vhuru kupirura veta, makura ta gava mpangera zokukazugumina Ndaniyera mekero lyovanyime. Nye hompa ta tantere Ndaniyera asi: ‘Karunga goge ogu o karere ngano ta ku parura.’

Daliusi ta guvu sili masiku ogo kapi ga rere. Ngurangura zokukwama ko ta dukire kekero lyovanyime. Apa kuvhura o mu mone. Ta zigire asi: ‘Ndaniyera, muntu gwaKarunga gomwenyo! Karunga ogu o kerere ana yi vhuru yokukuparura kovanyime ndi?’

Ndaniyera ta limburura asi: ‘Karunga kuna tumu muengeli a ya kumateke tuna tovanyime, yiyo vana dili kukwata nge.’

Hompa ta hafa unene. Ta pangere asi Ndaniyera va mu koke mo mekero. Makura ta ninki asi vagara wovadona, ava va here kugusa po Ndaniyera, va va zugumine kovanyime. Awo simpe nokukasika si konhi zekero, vanyime nare vana va kwata nokutezagura yisupa yawo nayinye.

Hompa Daliusi makura ta tjangere vantu navenye womouhompa wendi asi: ‘Tani panga asi navenye va fumadeke Karunga gwaNdaniyera. Age kurugana yitetu yoyinene. Age kuna zowora Ndaniyera kokumulya vanyime.’

Ndaniyera 6:1-28.