Icisimicisyo 79: Danyeli mwi Cengo lya Nkalamu
MAMA, mama! Cilukuboneka koti Danyeli ali mu kukatasiwa ukukulu. Pano inkalamu tasilukumusomesyapo! Kani wawisiba umulandu? Mba ninani uwabika Danyeli ne nkalamu syonse isi umu? Leka tubone.
Imfumu ya Babiloni pano mwalalume uwe sina lya Daliu. Alitemenwe makosa Danyeli nipakuti Danyeli wa nkumbu kabili wa mano. Daliu asalulula Danyeli ukuba icilolo icikulu mu bufumu bwakwe. Ici calenga abalalume bambi aba mu bufumu ukumfwila Danyeli akaso, popele ici eci bacita.
Baya kuli Daliu ne kulabila ati: ‘Twasuminisyanya, mwe mfumu, ati mupange ifunde ilya kweba’ti pa nsiku 30 takuli uwa kutembela kuli lesa uuli onse neli ku muntu sombi kuli mwebo, mwe mfumu. Uuli onse kani tomfwilile, eli woyo akelelwa ukuposwa mu nkalamu.’ Daliu tesibile umulandu aba abalalume balukufwaila ati ili ifunde lipangwe. Pano alanguluka ati lilangulusi iliweme, popele alembe’funde. Pano tesi lyalulwepo.
Ili Danyeli aisiba ili ifunde, aya mu ŋanda ne kutembela, fyenka filya acita lyonse. Abalalume ababipile baalisibile ati Danyeli tesi aleke ukutembela kuli baYehoba. Basangalala, nipakuti cilukuboneka ati ukwansika kwabo ukwa kufumyapo Danyeli kulukucitwa.
Ili Imfumu Daliu yaisiba umulandu aba balalume bafwaile ukupange’li ifunde, yabombomana makosa. Pano tesi yalulepo ifunde, popele ilyelelwe ukufunda ati Danyeli aposwe mwi cengo lya nkalamu. Pano imfumu yabula Danyeli ati: ‘Ndukucetekela ati baLesa wobe, babo upyungila, bakukupulusya.’
Daliu afitilwa makosa icakweba’ti afilwa ne kulala ubo busiku. Ulucelo lwakonkapo abutukila kwi cengo lya nkalamu. Ungamubona apo. Abilikisya ati: ‘Danyeli, wemupyungisi wa baLesa wa mweo! Kani baLesa babo upyungila bakupulusya ku nkalamu?’
Danyeli aasuka ati: ‘BaLesa bacituma inkalamba yabo ne kufumbata utunwa twa nkalamu icakweba’ti tasinsomesyepo.’
Imfumu yasangalala ukwakuti. Yafunda ati Danyeli bamufumyemo mwi cengo. Eli yafunda ati abalalume ababipile abalukufwaya ukufumyapo Danyeli baposwe mwi cengo lya nkalamu. Ili tabangafika na pansi ye cengo inkalamu syabekata ne kukonala onse amafupa abo.
Eli Imfumu Daliu yalembela ku bantu bonse mu bufumu bwaiko ati: ‘Ndukufunda ati uuli onse alyelelwe ukucindika baLesa bakwe Danyeli. Balacita ifimpelampela ifikulu. Bacipulusya Danyeli ku kulikwa ne nkalamu.’
Danyeli 6:1-28.
Ifyakwipusya
- Kani Daliu ninani, kabili alamubona syani Danyeli?
- Mba nifindo bamo bamo abalalume abakaso babula Daliu ukucita?
- Mba nifindo Danyeli acita ili aisiba ifunde lya bukumo?
- Mba nindo Daliu afitilwa makosa icakweba’ti afilwa ne kulala, kabili nifindo acita ulucelo lwakonkapo?
- Kani Danyeli amwasuka syani Daliu?
- Mba nifindo fyacitika ku balalume abalukufwaya ukwipaya Danyeli, kabili nifindo Daliu alembela bonse abantu aba mu bufumu bwakwe?
Ifyakwipusya na fimbi
- Pendeni Danyeli 6:1-28.
Mba filya abantu basuminansyenye ati bepaye Danyeli filatwanusyako syani ifi abapate besya ukucicila umulimo wa Bamboni sya baYehoba muli bulelo? (Dan. 6:7; Amasa. 94:20; Yisa. 10:1; Loma. 8:31)
Kani abapyungisi ba baLesa muli bulelo bangatuntulula syani Danyeli mu kukomekwa “kubukulu ububekalika”? (Dan. 6:5, 10; Loma. 13:1; Cit. 5:29)
Kani tungatuntulula syani icakubwenako cakwe Danyeli icakupyungila baYehoba “insiku syonse”? (Dan. 6:16, 20; Filip. 3:16; Fisu. 7:15)
