ດານຽນຢູ່ໃນຫລຸມສິງໂຕ
ບົດ 79
ດານຽນຢູ່ໃນຫລຸມສິງໂຕ
ໂອ້ ໂອ້! ເບິ່ງຄືວ່າດານຽນຕົກຢູ່ໃນຄວາມລຳບາກຫຼາຍແທ້ໆ. ແຕ່ສິງໂຕບໍ່ໄດ້ເຮັດອັນຕະລາຍແກ່ທ່ານເລີຍ! ເຈົ້າຮູ້ບໍວ່າເປັນຫຍັງ? ໃຜເອົາດານຽນຖິ້ມໄວ້ໃຫ້ຢູ່ກັບສິງໂຕເຫຼົ່ານີ້? ໃຫ້ເຮົາອ່ານຕໍ່ໄປ.
ຕອນນີ້ກະສັດແຫ່ງບາບີໂລນຊື່ວ່າດາຣີອຶເຊ. ທ່ານພໍໃຈໃນດານຽນຫຼາຍເພາະວ່າດານຽນເປັນຜູ້ມີໃຈເມດຕາແລະສະຫຼາດ. ດາຣີອຶເຊເລືອກດານຽນໃຫ້ເປັນຜູ້ປົກຄອງຕຳແໜ່ງສູງຜູ້ນຶ່ງໃນອານາຈັກຂອງທ່ານ. ເລື່ອງນີ້ເຮັດໃຫ້ຄົນອື່ນອິດສາດານຽນສະນັ້ນພວກເຂົາຈຶ່ງເຮັດດັ່ງນີ້.
ພວກເຂົາເຂົ້າໄປເຝົ້າດາຣີອຶເຊແລະທູນວ່າ: ‘ໂອ້ກະສັດ ພວກຂ້າພະເຈົ້າໄດ້ເຫັນພ້ອມກັນວ່າພະລາຊາຄວນຈະອອກກົດໝາຍວ່າ ໃນສາມສິບວັນນີ້ບໍ່ໃຫ້ຜູ້ໃດຜູ້ນຶ່ງອະທິດຖານຕໍ່ພະເຈົ້າອົງໃດໆຫຼືມະນຸດຄົນໃດເວັ້ນແຕ່ຕໍ່ພະອົງ. ຖ້າຜູ້ນຶ່ງຜູ້ໃດບໍ່ຟັງຄວນໂຍນຜູ້ນັ້ນເຂົ້າໄປໃນຫລຸມສິງໂຕ.’ ດາຣີອຶເຊບໍ່ຮູ້ເຫດຜົນທີ່ຄົນພວກນີ້ຕ້ອງການອອກກົດໝາຍເຊັ່ນນີ້. ແຕ່ທ່ານກໍ່ຄິດວ່າເປັນຄວາມຄິດທີ່ດີ ດັ່ງນັ້ນທ່ານຈຶ່ງໄດ້ອອກກົດໝາຍໃຫ້ຂຽນເປັນລາຍລັກອັກສອນໄວ້. ດຽວນີ້ກົດໝາຍກໍ່ປ່ຽນບໍ່ໄດ້ແລ້ວ.
ເມື່ອດານຽນຮູ້ເລື່ອງກ່ຽວກັບກົດໝາຍນັ້ນ ເພິ່ນເມືອເຮືອນແລະອະທິດຖານ ຕາມທີ່ເພິ່ນເຮັດສະເໝີມາ. ຄົນຊົ່ວເຫຼົ່ານັ້ນຮູ້ວ່າດານຽນຈະບໍ່ຢຸດຈາກການອະທິດຖານຕໍ່ພະເຢໂຫວາ. ພວກເຂົາດີໃຈເພາະເບິ່ງຄືວ່າແຜນການທີ່ຈະກຳຈັດດານຽນນັ້ນຈະເກີດຜົນຕາມຄວາມມຸ່ງໝາຍ.
ເມື່ອກະສັດດາຣີອຶເຊຮູ້ເຖິງເຫດຜົນທີ່ຄົນເຫຼົ່ານີ້ຕ້ອງການໃຫ້ອອກກົດໝາຍນີ້ ທ່ານເສຍໃຈຫຼາຍ. ແຕ່ທ່ານປ່ຽນກົດໝາຍບໍ່ໄດ້ ດັ່ງນັ້ນທ່ານຈຶ່ງຕ້ອງສັ່ງໃຫ້ເອົາດານຽນຖິ້ມລົງໃນຫລຸມສິງໂຕ. ແຕ່ກະສັດບອກດານຽນວ່າ: ‘ເຮົາຫວັງວ່າພະເຈົ້າຂອງເຈົ້າ ຜູ້ທີ່ເຈົ້າຮັບໃຊ້ ຈະຊ່ວຍເຈົ້າໃຫ້ລອດ.’
ດາຣີອຶເຊຮູ້ສຶກວ່າມີອາລົມບໍ່ດີແລະທ່ານນອນບໍ່ຫຼັບໃນຄືນນັ້ນ. ຕື່ນເຊົ້າມື້ໜ້າທ່ານແລ່ນໄປທີ່ຫລຸມສິງໂຕ. ເຈົ້າສາມາດເຫັນທ່ານໄດ້ທີ່ນັ້ນ. ທ່ານຮ້ອງເອີ້ນວ່າ: ‘ໂອ້ ດານຽນ ຜູ້ຮັບໃຊ້ຂອງພະເຈົ້າຜູ້ມີຊີວິດຢູ່! ພະເຈົ້າຜູ້ທີ່ເຈົ້າຮັບໃຊ້ສາມາດຊ່ວຍເຈົ້າໃຫ້ພົ້ນຈາກສິງໂຕໄດ້ບໍ?’
ດານຽນຂານຕອບວ່າ: ‘ພະເຈົ້າຜູ້ຊຶ່ງຂ້າພະເຈົ້າຮັບໃຊ້ໄດ້ສົ່ງທູດສະຫວັນຂອງພະອົງ ແລະໄດ້ປິດປາກຂອງສິງໂຕໄວ້ເພື່ອມັນຈະບໍ່ເຮັດອັນຕະລາຍແກ່ຂ້າພະເຈົ້າ.’
ກະສັດຮູ້ສຶກຍິນດີຍິ່ງ. ທ່ານຈຶ່ງສັ່ງໃຫ້ຍົກດານຽນອອກຈາກຫລຸມ. ແລ້ວທ່ານໄດ້ສັ່ງໃຫ້ເອົາຄົນພວກໃຈໂຫດນັ້ນຜູ້ທີ່ຢາກກຳຈັດດານຽນນັ້ນໂຍນຖິ້ມໄປໃຫ້ສິງໂຕ. ແມ່ນວ່າພວກເຂົາຍັງບໍ່ທັນຕົກລົງພື້ນຂອງຫລຸມນັ້ນ ສິງໂຕເຫຼົ່ານັ້ນກໍ່ກະໂດດຄວ້າໃສ່ພວກເຂົາແລະຂົບກະດູກທັງໝົດຂອງເຂົາໃຫ້ຫັກເປັນທ່ອນໆ.
ແລ້ວກະສັດດາຣີອຶເຊຈຶ່ງຂຽນຄຳປະກາດ ເຖິງພົນລະເມືອງທຸກຄົນໃນອານາຈັກຂອງທ່ານວ່າ: ‘ເຮົາສັ່ງໃຫ້ທຸກໆຄົນໃຫ້ຄວາມເຄົາລົບຕໍ່ພະເຈົ້າຂອງດານຽນ. ພະອົງໄດ້ກະທຳການອັດສະຈັນອັນໃຫຍ່ຫຼວງ. ພະອົງໄດ້ຊ່ວຍດານຽນໃຫ້ພົ້ນຈາກປາກສິງໂຕ.’
