¡KEʼYINKA Daniel ma tzaj jun mya bʼaʼn tiʼj! ¡Pero mitiʼ nok bʼinchaʼn mya bʼaʼn tiʼj kyuʼn león! ¿Nel tnikʼe tiquʼn? ¿Alkye sokx qʼonte Daniel kyxol qejo león lu? Qo xnaqʼtzan tiʼj.

Aju nkawintl tuj Babilonia jaʼle ajo xjal Darío tbʼi. Tbʼanel nela Daniel toj twitz Darío tuʼnju tbʼanel xjal te ex at nim tnabʼil, ix ok tqʼoʼn Darío toklen Daniel te jun nejenel tuj tkawbʼil. Tuʼntzen jlu, e ok ten txqantl xjal qʼojil tiʼj Daniel, ex kubʼ kybʼinchen jlu:

Eʼx tukʼe Darío ex xi kyqʼamaʼn jlu te: ‹Qaje qkyaqile tuʼn tkubʼ tqʼoʼna jun ley aju in tqʼamaʼn qa toj jun xjaw mijun xjal tuʼn tkubʼ ten kubʼsal twitz juntl dios nix twitz juntl xinaq, noq oʼkx twitza, tat ajkawil. Qa at jun mintiʼ xi tbʼiʼn, iltiʼj tuʼn tkuʼx xoʼt (xoyit) tuj kyjul bʼalun›. Mitiʼteq ojtzqiʼn tuʼn Darío tequʼn kyajbʼiltaq xjal tuʼn tkubʼ tzʼibʼet aju kawbʼil lu. Pero tbʼanel ela toj twitz, ex kubʼ ttzʼibʼan aju ley lu. Ex aju kawbʼil lu melaytaq kubʼ chʼixpet.

Tej tok tbʼiʼn Daniel jlu, xiʼ tja ex ok ten naʼl Dios ik tzaʼntoq in bʼant tuʼn. Ajtzqilaʼnteq kyuʼn qeju mya bʼaʼn xjal qa nlaytaq kyaj ttzaqpiʼn Daniel tuʼn tnaʼn Dios te Jehová. E jaw tzalaj tuʼnjo kubʼ kyximin qa kkyimeltaq Daniel kyuʼn.

Tej tel tnikʼ ajkawel Darío tiʼj jlu, tzaj tbʼis tuʼn. Naqtzun tuʼnj melayteq chʼixpet kawbʼil tuʼn, ex iltoq tiʼj tuʼn t-xe tmaʼn tuʼn tkux xoʼn Daniel kyxol león. Xitzun tqʼamaʼn ajkawil jlu te Daniel: ‹Awt ju tDiosa, aju in ajbʼena te tkyaqil qʼij klonte teya›.

Nim nximentoq Darío, tuʼntzunju mitiʼ jtan toj qonikʼen aju. Tej qsqix tuj juntl qʼij xiʼnaj ttziʼ kyjul león. Lu at ttziʼ jul ik tzeʼnj tkuʼx tuj tilbʼilal. Kux ẍchʼin ex tqʼama: ‹¡Daniel, aya tmajen Dios itzʼ! ¿Mape kleta tuj kytzi bʼalun tuʼn tDiosa aju in ajbʼena te?›

Tzaj ttzaqʼweʼn Daniel kyjaʼ: ‹Ma tzaj tsamaʼn nDiose t-anjel, ex ma lamet kytzi león tuʼn, tuʼn miʼn nxi chyoʼne kyuʼn›.

Nimxix jaw tzalaj ajkawil. Ex xi tmaʼn tuʼn tjatz qʼiʼn Daniel tuj kyjul bʼalun. E kuxtzun xoʼn qe mya bʼaʼn xjal aqejo kyajbʼiltoq tuʼn tkubʼ kybʼiyoʼn Daniel. Tej naʼnxtoq kykuʼpun tzʼaq kyxol león e tzyet kyuʼn, ex bʼiʼx e bʼaj tzaqun kyuʼn.

Xitzen ttzʼibʼin ajkawil Darío kye kykyaqil xjal jlu: ‹Che nimane kykyaqile teju tDios Daniel. Quʼn in tbʼincha qe bʼinchbʼen nim kyxilen. A ma klonte Daniel tuj kytzi bʼalun›.