¡OK IX mä yamë Daniel yajpääty! ¡Ets ixë tadë kääjëty kyaj wiˈix jam tyunyëty! ¿Mnijäˈäp tiko? ¿Pënë Daniel ojts kyujëduwëty kää jutoty? Min nˈokˈijxëm.

Ja jäˈäy diˈibë nety reyˈäjtp Babiloñʉ ja txëˈäjty Dariyë. Dariyë oy mëët ojts nyaymyënejxyëtyë Daniel yëˈko oyjyaˈay ets wijy, ets pääty nandëˈën tpëjtaky ets yˈanaˈamët. Per ta näägë jäˈäy tˈaxëkˈijxtë Daniel, min nˈokˈijxëm ti tyuundë:

Ojts tninëjxtë ja Dariyë ets tˈanmääytyë: Niˈamukë ëëtsëty, yëˈëjëts ntsojktëp ets xyjyaˈayët tuˈugë anaˈamënë diˈib jënäˈänëp ko 30 xëë, nipën tkamënuˈkxtäˈägëdë wiink dios, ets ni wiink jäˈäy, mijts jeˈeyë diˈib myajmënuˈkxtäˈägëp. Pën ja pën diˈib kyaj tmëmëdoyë tyäˈädë anaˈamënë, ta yajkujëduwët kää jutoty. Dariyë yˈoymyëdoo wiˈix yaˈanmääjy, ta tjääjy ja anaˈamënë pes kyaj nety tnijawë tidën ko ja jäˈäy ttsoktë ets dëˈën yajjäˈäyët ja anaˈamënë. Ets ko tjääytyaajy ja anaˈamënë kyaj mbäät ojts tnekyyajtëgatsy.

Ko ja Daniel tnijäˈäjë ja jembyë anaˈamënë, ta ojts nyejxy mä tyëjk ets ta tmënuˈkxtakyë Jyobaa extëmë nety xëmë ttuny. Ja axëkjäˈäyëty nyijäˈädëbë nety ko Daniel dëˈënyëm tˈawdatäˈänyë Jyobaa. Ta xyondaktë, yëˈko wyinmääytyë ko oogëbë netë Daniel.

Ko ja rey tpejkyë kuentë ti nety jam tuun jäjtëp, ta jyotmaytyuktëjkë. Per kyaj mbäät ja anaˈamënë tnekyyajtëgäjtsy, pääty kuanë ko ojts tniˈanaˈamë ets ja Daniel yajkujëduwët kää jutoty. Per ta tˈanmääyë Daniel: Nˈawijxypyëts etsë tadë Dios diˈib mijts mëduumpy myajtsoˈogëdët.

Dariyë kyaj myaajy mä tadë ux. Ets ja kum bom ta pëyeˈegyë ojts nyejxy mä ja kää jut. Ta jyajty extëm yam xyˈixy. Ta tkukäjxnäjxyë Daniel: ¡Daniel mijts diˈib mëduumbyë Diosë tëyˈäjtënbë! ¿Të mguniˈxyëty ja Dios diˈib mëduumpy ets kyaj wiˈix ja kää mdunëdët?

Ta ja Daniel yˈatsoojy: Dios yëˈë të tkexyë yˈanklës ets të tˈamäjtstäˈäyë tadë kää etsëts kyaj wiˈix xytyunët.

Ja rey ta jyantsy xyondaky ets ta ojts tniˈanaˈamë ets yajjuudëdë Daniel kää jutoty ets yajkujëduwëdët ja axëkjäˈäy diˈibë Daniel jayaˈooganëdë. Ets ni oynyëmë nety jap kyakäˈädë kää jutoty, ko ja kää ojts yˈamoot tyukmoodëdë.

Ta ja rey tjääjy tuˈugë anaˈamënë mä tˈanmääjy niˈamukë nax käjpn: Wintsëˈëgëdë niˈamukë diˈib Diosˈäjtypyë Daniel. Tadë Dios tyuumbyë mëjˈäjtënë mëjwiin kajaa. Yëˈë të tkuniˈxyë Daniel ets këdiibë kää tsyuˈutsëdët.