TALA! ci moneka ngue Ndaniele a li mu vukalu vua kama. Vunoni vandumba ka vesi na ku mu lia! Ua tantekeya omo lia vika? Iya na mbila Ndaniele omu mu cipuku ca vandumba? Tu ci tantekeye.

Vuovuno muangana ua Mbambilone ikeye Ndaliyu. Ua lema cikuma Ndaniele muomu ua kala na mana na ngozi. Ndaliyu ua mu hanguile ku pua mukuluntu mu vuangana vueni. Eci ca lingisile vantu va vengi ku mu vuila cipululu, ngeci mukemuo va lingile ngecize:

Va ile kuli Ndaliyu na ku ka mu leka nguavo: ‘A muangana, tua litavasiana nguetu, u na pande ku haka lisiko li lekesa ngecize mu matangua 30, na umo uahi na pande ku lemesa njambi ueka ni muntu ueka, ku vanga yove lika muangana. A muangana uose uze ka kononoka, tu na pande ku mu mbila mu cipuku ca vandumba’. Ndaliyu ka tantekeyele vika vaze vamala va tondele eli lisiko lia ngecize. Vutuhu ngoco, ua muene ngueni via puile visinganieka via cili, ngeci ua tavele ngueni va soneke lisiko liaco. Vuovuno honi ka citava ku alulula lisiko liaco.

Kaha omo Ndaniele ua tantekeyele via lize lisiko, ua ile ku ndzivo yeni na ku vundila ngue muze mua kele na ku linga. Vaze vamala va vapi va tantekeyele nguavo Ndaniele ka ka tava ku likela ku vundila kuli Yehova. Ngeci va viukililile cikuma muomu va tantekeyele nguavo vutumbe vuavo vua ku tsiha Ndaniele vu ka lipuisamo.

Omo Muangana Ndaliyu ua tantekeyele vutumbe vua lize lisiko, ua vuile vusiua vua kama. Vunoni ka ca tavele ku alulula lisiko liaco, ngeci ua tumine va mbile Ndaniele mu cipuku ca vandumba. Kaha muangana ua lekele Ndaniele ngueni: ‘Nja kulahela nguange Njambi yove i ue ku pangela aka ku ovola’.

Ndaliyu ua kosele cilavulavu. Kaha lia mukuavo cimene, ua tuntilile ku cipuku ca vandumba. U hasa ku mu mona aha. Kaha ua tambakanene ngueni: ‘Ndaniele ngamba ya Njambi mukua muono! Vuno Njambi u ua pangela na hasa ku ku ovola kuli vandumba, ni?’

Kaha Ndaniele ua kumbuluile ngueni: ‘Njambi na tumu kangelo keni na ku soka tunua tua vandumba ngeci ka va nji vulumuine’.

Kaha muangana ua viukilile cikuma. Ngeci ua tumine linga va mu tuhule mu cipuku. Kaha ua tuma naua ngueni vakuate vaze vamala va lingisile linga Ndaniele va mu mbile mu cipuku ca vandumba, kaha va va mbilile mu cipuku ca vandumba. Na ku heta ku masima kanda vandumba va va kavuilile na ku pokoziola vitsiha viavo viose.

Kaha Muangana Ndaliyu ua tumbikile lisiko, ngueni: ‘Vantu vose va na pande ku singimika Njambi ya Ndaniele. Muomu ue ku linga vikomoueso. Novola Ndaniele ku tunua tua vandumba.’