Tanojnots 79

Daniel kipantamotkej kampa yetoyaj tekuanimej

¡XIKITA! Semi tamouililpan kampa moajsi Daniel. ¡Sayoj ika tekuanimej amo teyi kichiuiliaj! ¿Tikmati keyej? ¿Akoni kipantamotak Daniel kampa yetokej tekuanimej? Maj tikitakan.

Tein tekiuajtitoya Babilonia, katka se takat tein motokaytij Darío. Daniel kitelyolpaktiaya tekiuaj, ta katka yolkuali uan tamatkej, uan kimakak se ueyi tanauatil itech itekiuajyo. Ika nejin, seki takamej kinexikoluijkej Daniel, uan yejua nejin tein kichiujkej:

Kiitatoj Darío uan kiiluijkej: ‘Tejuatsin tekiuaj, tinochin tiknekij xiktali se tanauatil, maj kijto ika 30 tonalmej maj amo akin kichiua netataujtil iuan niose dios niono iuan se takat, ta sayoj tejuatsin tekiuaj. Komo aksa amo kitakamati, maj kipantamotakan kampa yetokej tekuanimej’. Darío amo kimatia keyej takamej kinekiaj nejin tanauatil. Sayoj ika, yej moluij ika kuali yetoya uan kijkuiloj tanauatil. Satepan amo ueliaok mopataya.

Keman Daniel kikakik nejin, yajki ichan uan kichiuato inetataujtil kemej ipa. Takamej tein amo yolkualmej, kimatiaj ika Daniel kisentokaskia kichiuaskia netataujtil iuan Jiova. Yejika yolpakkej, ta moluiayaj ika yaya mochiuati tein kinekiaj maj kipanouani Daniel.

Keman tekiuaj Darío kimatik tein mochiujtoya, motayokoltij. Sayoj ika amo ueliaok kipataya tanauatil, uan kijtoj maj kipantamotanij Daniel kampa yetoyaj tekuanimej. Sayoj ika tekiuaj kiiluij Daniel: ‘Nikchia maj mitsmakixti moDios akin tiktekitilia’.

Darío moteltekipachojtoya uan niono uelik kochik nejon youak. Mostika kualkan motaloj itech taltekoch kampa yetoyaj tekuanimej, kemej tikita itech taixkopin. Kijtoj chikauak: ‘¡Daniel, itekitikauj Dios tein yoltok! ¿Uelik mitsmakixtij moDios akin tiktekitilia?’

Daniel kinankilij: ‘Dios kiualtitanik se iángel, uan kintentsakuako tekuanimej maj amo teyi nechchiuilianij’.

Tekiuaj tel yolpakik. Uan tanauatij maj kikixtianij Daniel itech taltekoch. Ompa tanauatij maj kinpantamotilianij tekuanimej, takamej amo yolkualmej tein kinekiaj maj miki Daniel. Uan keman nejin takamej kinpantamotkej, niono ajsikej tatsintaj uan tekuanimej kinajkotsikuinkauijkej uan kinkuajkej.

Satepan tekiuaj Darío kintajkuilouilij nochin tein kinixyekanaya: ‘Xikpoujkaitakan iDios Daniel. Yej kichiua uejueyi mouiskatekimej. Uan kipaleuij Daniel maj amo teyi kichiuilianij tekuanimej’.

Daniel 6:1-28.