TLAPOUALISTLI 79

Daniel okitlamotlakej kanin okatkaj Leones

¡XIKITA! Moita Daniel kipanotok miak ouijkayotl. Maski ijkon, ¡leones amo itlaj kichiuilijtokej! ¿Tikmati tleka? ¿Tikmati akin okitlamotlak Daniel kanin katej ninmej leones? Ma tikitakan.

Itech non tonalmej ueyi tekiua itech Babilonia omotokayotiaya Darío. Daniel okiyolpaktiaya Darío pampa Daniel okatka yolkuali uan ixtlamatki, ik non, okitlali ken se tekiua. Ik non, sekimej tlakamej okinexikolitakej uan okichijkej nin:

Okitato Darío uan okiluijkej: ‘Tinochtin tiknekij, oh ueyi tekiua, xiktlali se tlanauatil tlen kijtos ipan 30 tonalmej amo akaj ma motlatlaujti ixpan se teotsin nion itech tlakatl, san motech ma motlatlaujti, oh ueyi tekiua. Tla akaj amo kitlakamatis nin tlanauatil, moneki kitlamotlaskej kanin katej leones’. Darío amo okimatiaya tleka ninmej tlakamej okinekiayaj kichiuaskej nin tlanauatil. Maski ijkon, ye omokuayejyeko kuali yetoskia kitlaliskia nin tlanauatil, ik non okijkuilo nin tlanauatil. Uan axkan tlanauatil ayakmo uelis mopatlaskia.

Ijkuak Daniel okikak itech nin tlanauatil, oyajki ikalijtik uan ompa omotlatlaujti ijkon ken nochipa okichiuaya. Tlakamej tlen amo yolkualmej okimatiayaj Daniel nochipa motlatlaujtiskia ixpan Jehová. Oyolpakej pampa omoitaya mochiuaskia tlen yejuan okinekiayaj, kimiktiskiaj Daniel.

Ijkuak ueyi tekiua Darío okimatki tleka tlakamej okinekiayaj ma mochiua non tlanauatil, ueyi tekiua omoyolkoko miak. Maski ijkon, ye amo ueli okipatlak tlanauatil, ik non, otlanauati ma kikajkauakan Daniel ijtik koyoktli kanin okatkaj leones. Maski ijkon, ueyi tekiua okilui Daniel: ‘Nikchia ma mitsmakixti moDios akin tiktekichiuilia’.

Darío melauak omotekipacho miak uan itech non yoak amo ueli okochki. Mostlatika, omotlalo pampa oyajki itech koyoktli kanin okatkaj leones. Ijkon ken tikita itech tlaixkopinal. Ueyi tekiua chikauak otsajtsik: ‘¡Daniel, itekipanojka Dios akin melauak yoltok! ¿Ueli omitsmakixti itech leones moDios akin tiktekichiuilia?’.

Daniel okinankili: ‘NoTajtsin Dios okiualtitlanki iángel uan okinkamatsakuak leones pampa amo itlaj nechchiuiliskiaj’.

Ueyi tekiua oyolpakik miak. Otlanauati ma kikixtikan Daniel itech koyoktli. Ijkuakon, tlakamej tlen okinekiayaj ma miki Daniel okintlamotlakej kanin okatkaj leones. Uan ninmej tlakamej amo yolkualmej achto ajsiskiaj ijtik koyoktli, leones okinkitskijkej uan okinpojpostekilijkej nochtin iomiuan.

Ijkuakon, ueyi tekiua Darío okinmijkuilili nochtin tlaltikpaktlakamej itech itekiuajkayo: ‘Nochtin namejuan xiktlakaitakan iTajtsin Dios Daniel. Ye kichiua uejueyij milagros. Ye okimakixti Daniel pampa amo ma kikuakan leones’.

Daniel 6:1-28.