TALA! Daniele ngoti ukahi movitateka ovinene. Mahi, ononkhulika kambukahi nokumulinga omapita. Ove utyii omokonda yatyi? Olie wapaka Daniele mo nonkhiyama ombo ambuho? Tutalei.

Ohamba yo Mbambilonia ankho pahe o Dariu. Dariu ankho uhole unene Daniele. Mokonda Daniele ankho ondalawa, tupu omunongo. Dariu ankho waholovona Daniele opo akale onkhalamutue mouhamba wae. Moluotyo, ovalume ovakuavo mouhamba, avalingila Daniele onkhi.

Ovalume ovo vaya ku Dariu, avati: ‘Onthue tuatokola okuti ove Hamba, mohoneka otyitumino tyokuti mononthiki 30, nawike omunthu upondola okulikuambela ku huku omukuavo ine okomunthu. Ovanthu aveho vena okulikuambela vala kuove Hamba. Una wehetavela, una yokuyumbwa meleva lio nonkheyama.’ Dariu ankho ketyii omokonda yatyi ovalume ovo vahandela otyitumino otyo. Mahi, wasoka okuti olusoke olo lukahi nawa. Atumu okuhoneka otyitumino otyo. Iya pahe ankho katyipondola vali okupilululwa.

Etyi Daniele eiva otyitumino otyo, aende keumbo liae, ekelikuambela ngetyi ankho alingale. Ovalume ovo vonondingavivi, ankho vetyii okuti Daniele kamayekepo okulikuambela ku Yehova. Avahambukwa unene, mokonda ankho ehando liavo limoneka ngoti malifuisuapo.

Etyi Ohamba Dariu anoñgonoka omokonda yatyi ovalume ovo vahandela otyitumino otyo, anumana unene. Anthi, ankho kapondola vali okupilulula otyitumino otyo. Ngotyo, watuma okukayumba Daniele meleva lio nonkheyama. Mahi, wapopila Daniele okuti: ‘Ame ndyina ekevelelo liokuti Huku yove, ou ukahi nokuumbila, mekuyovola.’

Dariu kalele otyinthiki otyo, mokonda ankho wanumana unene. Etyi kuatya, akahatekela liwa keleva lio nonkheyama. Oyoo tala, polutalatu olu. Alaveleya, okuti: ‘Daniele, omuumbili wa Huku Yomuenyo! Okuti Huku yove ou uumbila, wekuyovola ko nonkhulika?’

Daniele akumbulula okuti: ‘Enga, Huku watuma oandyu yae, opo ipate omilungu vio nonkhulika. Moluotyo, kambandyipaele.’

Ohamba ahambukwa unene. Atumu okupola Daniele meleva. Konyima, atumu okuyumba meleva liononkhulika, ovalume vana ankho valingila onkhi Daniele. Etyi vayumbuamo kavehikiliale pohi ononkhulika ambuveyakula ambuveteyateya omankhipa no kulitunyaunina.

Okuhulako Ohamba Dariu ahonekela ovanthu aveho, mouhamba wae ati: ‘Ame ndyituma ovanthu aveho vakale nonthilo na Huku ya Daniele. Mokonda walinga omahuviso omanene. Wayovola Daniele ko nonkhulika.’