Danieli omu Kiina Ky’Entare
Ekitebyo 79
Danieli omu Kiina Ky’Entare
AI BAMBE! Nikireebeka ngu Danieli ari omu kabi kahango. Kwonka entare tiziine kibi kyona eki zirikumukoraho! Noomanya ahabw’enki? N’oha owaataire Danieli omuri ezi ntare? Ka twetegyereze.
Omugabe wa Babulooni hati n’omushaija orikwetwa Dario. Naakunda Danieli munonga ahabw’okuba Danieli n’omunyambabazi kandi aine obwengye bwingi. Dario atoorana Danieli kuba omukuru omu bugabe bwe. Eki kireetera abandi bashaija omu bugabe kugirira Danieli eihari, n’ahabw’ekyo, eki nikyo bacwamu kukora.
Bagyenda baza ahari Dario bamugira bati: ‘Twikiriziine, Ai omugabe, ngu oteho ekiragiro kirikugira ngu omu biro 30 tihaine omuntu oshemereire kushaba ruhanga weena nari omuntu weena okwihaho iwe, Ai omugabe. Omuntu weena ku araagome, obwo anagwe omu kiina ky’entare.’ Dario tarikumanya ahabw’enki aba bashaija barikwenda eki kiragiro kuteebwaho. Kwonka ateekateeka ngu n’ekiteekateeko kirungi, n’ahabw’ekyo akita omu buhandiikye. Hati ekiragiro tikyakibaasa kuhindurwa.
Danieli ku amanya eby’eki kiragiro, aza omuka ashaba nk’oku atuura naakora. Aba bashaija babi nibamanya ngu Danieli akaba atarikwija kureka kushaba Yehova. Bashemereirwe, ahabw’okuba nikireebeka ngu enaama yaabo ey’okumaraho Danieli neeza kukora.
Omugabe Dario ku amanya ahabwaki aba bashaija beenzire kukora eki kiragiro, ashaasha munonga. Kwonka takyahindura kiragiro eki, n’ahabw’ekyo aine kutaho ekiragiro ngu Danieli anagwe omu kiina ky’entare. Kwonka omugabe agambira Danieli ati: ‘Nyine amatsiko ngu Ruhanga waawe ou oheereza obutoosha naaza kukujuna.’
Dario aguubwa kubi munonga n’oturo ekyo kiro tumuburira. Omu kasheeshe akaakuratsireho airuka aza aha kiina ky’entare. Noobaasa kumureeba aho. Ayeta n’eiraka rihango ati: ‘Danieli, omuheereza wa Ruhanga ohuriire! Ruhanga ou oheereza abaasize kukujuna entare?’
Danieli agarukamu ati: ‘Ruhanga ayoheereize maraika we yaigara eminwa y’entare, kandi tiziine ku zingizire.’
Omugabe ashemererwa munonga. Aragiira ngu Danieli aihwe omu kiina. Bwanyima aragiira kureeta abashaija ababi abaagyerizeho kwita Danieli ngu banagwe omu ntare. Batakahikire ahansi omu kiina, entare zibashamira omu mwanya kandi zihendagura amagufa gaabo goona.
Bwanyima omugabe ahandiikira abantu boona omu bugabe bwe ati: ‘Naataho ekiragiro nti buri muntu ashemereire kuheereza Ruhanga wa Danieli ekitiinisa. Niwe akora eby’okutangaaza by’amaani. Ajunire Danieli okumwiha omu maino g’entare.’
