RÄ ꞌMEDE 79
Daniel o ha rä ngu yä zate
¡HYANDI! Daniel bi tꞌe̱ntꞌi ha rä ngu yä zate. ¡Pe nuyu̱ yä zate hinxä za Daniel! ¿Gi pädi por hanja? ¿Toꞌo bi mända ge xä tꞌe̱ntꞌi Daniel ha rä ngu yä zate? Ma gä handihu̱.
Nubye̱, nꞌa ñꞌo̱ho̱ mrä thuhu Dario go geꞌä mi mända ha Babilonia. Nuni ndä xa mi numäñho Daniel ngeꞌä xa mrä hojäꞌi ꞌne xa mi ja ndunthi rä mfädi, hänge bi hñutsꞌi de gä ndä ha rä tsꞌu̱tꞌhui. Pe rꞌa yä ñꞌo̱ho̱ bi embidiabi Daniel, ¿gi pädi te bi me̱fi nuꞌu̱ yä ñꞌo̱ho̱?
Nuꞌu̱ yä ñꞌo̱ho̱ bi ma bä nuu Dario ꞌne bi ꞌñembi: “Gatꞌho nuje di nehe gi yꞌofo nꞌa mhända habu̱ di enä ge po 30 yä pa, gatꞌho yä jäꞌi hindä xatuäbi nixi nꞌa jäꞌi ha nixi mänꞌa zidada, ho̱nse̱ nuꞌi zi ndä. Mu̱ toꞌo hindä yꞌo̱de, mända dä tꞌe̱ntꞌi ha rä ngu yä zate”. Dario hingä mi pädi por hanja nuꞌu̱ yä ñꞌo̱ho̱ mi adi dä tꞌofo nunä mhända, pe bi ho näꞌä bi yꞌo̱de ꞌne bi yꞌofo näꞌä mhända. Mi tꞌofo näꞌä mhända, yä hinto ma xä za xä paati.
Mi yꞌo̱de Daniel näꞌä xki thogi, bi ma ha rä nguu ꞌne bä xadi xa ngu mi ja nzäntho. Nuꞌu̱ yä nduxte ñꞌo̱ho̱ mi pädi ge Daniel ma xä sigi xä xatuäbi Jeoba. Xa mi johya ngeꞌä mi huyämu̱i ge nubye̱ hää, ya hingä ma xä hyandi Daniel.
Mi bädi Dario näꞌä mi thogi ko Daniel, xa bi durämu̱i. Pe ya himi tsa xä paati näꞌä xki yꞌofo. Pe̱ꞌtsi te bi mända bi tꞌe̱ntꞌi Daniel ha rä ngu yä zate. Pe Dario näꞌä ndä, bi ꞌñembäbi Daniel: “Di to̱ꞌmi ge dä maxꞌäꞌi näꞌä ri Zi Dada gi pe̱päbi”.
Dario xa mi turämu̱i, himbi za bi ñꞌähä näꞌä xuiꞌä, ꞌne ngu bi hyatsꞌi, nguntꞌä bi ma ha mi jotꞌi yä zate. ¿Gi handi habu̱ ꞌmai? Dario bi maꞌti Daniel ꞌne bi ꞌñembi: “¡Daniel, rä ꞌme̱goꞌi näꞌä Zi Dada ꞌmu̱i pa nzäntho! ¿Bi za bi ñäñꞌäꞌi näꞌä Zi Dada gi pe̱päbi?”.
Daniel bi dädi: “Äjuä bä pe̱hni nꞌa rä e̱nxe̱ ꞌne bi gotꞌpäbi yä ne nuyu̱ yä zate pa himbi zagi”.
Dario xa bi johya. Bi mända bi ju̱ki Daniel de rä ngu nuꞌu̱ yä zate, ꞌne bi mända go da tꞌe̱ntꞌi nuꞌu̱ yä nduxte ñꞌo̱ho̱ mi ne te dä yꞌo̱tpäbi Daniel. Nixi mi tagi mbo nuꞌu̱ yä ñꞌo̱ho̱ nuꞌmu̱ nuꞌu̱ yä zate bi gu̱ bi tu̱ni ꞌne bi xe̱ni.
Nubye̱ Dario bi mända bi tꞌofo nꞌa mhända pa gatꞌho rä hnini: “Umbäbihu̱ rä tꞌekꞌei näꞌä Zi Dada di nsunda Daniel. Näꞌä Zi Dada di ja yä däta milagro. Näꞌä bi ñäni Daniel de rä ne yä zate”.
