Daniel leonespa chawpinpi
79 yachachiy
Daniel leonespa chawpinpi
¡QHAWARIY! Danielqa may phutisqa kachkan. ¡Chaywanpis leonesqa mana Danielta mikhukapuchkankuchu! ¿Imarayku? ¿Pitaq chayman Danielta wikchʼuykurqa?
Chay pacha Babiloniap reyninqa Darío sutikurqa. Payqa Danielta kʼacha runa, yachayniyuq kasqanrayku munakuq. Chantapis Danielta kamachinanpaq churarqa, chayrayku wakin runaqa Danielta chiqnikurqanku, jinatataq ruwarqanku.
Dariopman rispa nirqanku: ‘Tukuypis kayta munayku, jatun rey, juk leyta ruway mana pipis 30 pʼunchaykunapi mayqin diosmanta, nitaq mayqin runamantapis mañakunanpaq, manachayqa qamllamanta mañakuchun, reyniyku. Mana kasukuqqa, leonesman wikchʼusqa kachun’, nispa. Darioqa mana yacharqachu imaraykuchus chay runas chay leyta munasqankuta. Chaywanpis allinllan kasqanta nispa, chayta qillqarqa. Leyqa mana tikrakuqchu.
Daniel chayta uyariytawan wasinman ripuspa, sapa pʼunchayjina Jehovamanta mañakurqa. Chay saqra runasqa Daniel sapa pʼunchay mañakusqanta yacharqanku. Chayrayku Danielta wañuchisunchik, nispa kusikurqanku.
Rey Darío Danielta wañuchiyta munasqankuta yachaytawan mayta phutikurqa. Chaywanpis, kamachisqantaqa manaña tikrayta atirqachu, jinamanta Danielta leonespa tʼuqunman wikchʼurqanku. Chaywanpis, reyqa Danielta nirqa: ‘Tukuy sunqu servichkanki, chay Diosniyki qamta librasuchun’, nispa.
Chaywanqa Darío chay tuta mana puñuyta atirqachu. Sutʼiyaymantataq usqhayta leonespa tʼuqunman rirqa. Dibujitupi rikunkijina, qhaparichkan: ‘¡Daniel, kawsaq Diospa kamachin! ¿Pitachus servinki Diosniyki leonesmanta salvasuyta atinchu?’, nispa.
‘Dios angelninta kachamuwan, leonespa siminkutataq wisqʼaykurqa, mana imananawankupaq’ nispa Daniel kutichirqa.
Reyqa chayta uyarispa mayta kusikurqa. Danielta juskʼumanta urqhunankuta nirqa. Chanta Danielta wañuchiyta munaqkunata leonespa tʼuqunman wikchʼuykuchirqa. Manaraq pampaman chayachkaptinkutaq, leonesqa mitharpaspa pʼataykunku.
Chanta rey Darío tukuy runakunaman qillqarqa: ‘Danielpa Diosninta tukuy jatunpaq qhawankichik. Payqa tʼukuna kʼacha imasta ruwan. Pay Danielta leones mana mikhukapunankupaq jarkʼan’, nispa.
