AH, AH! Kusaoneka ninga Danyeli ali m’nyatwa zizinji. Mbwenye zinkhalamu nee zamphekesa tayu! Kodi musadziwa thangwi yanji? Kodi mbani adaikha Danyeli umu na zinkhalamu zonsene zenezi? Tendeni tione.

M’nzidzi uneule mambo wa Babiloni akhali mamuna wakucemerwa Dariyo. Iye akhafunadi kakamwe Danyeli thangwi Danyeli akhali wadidi kakamwe na wanzeru. Dariyo asankhula Danyeli kuti akhale ntongi wankulu m’umambo wace. Pyenepi pyacitisa amuna anango m’umambo kukhala na ntsanje na Danyeli, natenepa ipi ndipyo pidacita iwo.

Iwo aenda kwa Dariyo mbalonga: ‘Tabverana, O mambo, kuti imwe musafunika kucita mwambo mbamulonga kuti m’ntsiku 30 nee munthu mbodzi asafunika kuphembera kwa mulungu unango peno kwa mamuna kusiyapo imwe, O mambo. Ule anakhonda bvera, asafunika kuponyiwa m’dzenje ya zinkhalamu.’ Dariyo nee akhadziwa thangwi yanji amuna anewa akhafuna kuti mwambo unoyu ucitiwe. Mbwenye anyerezera kuti ikhali nyerezero yadidi, natenepa alembesa mwambo unoyu. Tenepa mwambo nee mbudakwanisika kucinjwa tayu.

Mudadziwa Danyeli pya mwambo unoyu, iye aenda ku nyumba mbaphembera, tenepa ninga pikhacita iye m’nzidzi onsene. Amuna akuipa akhadziwa kuti Danyeli nee mbadadzalimira kuphembera kwa Yahova. Iwo akomerwa, thangwi aona kuti masasanyiro awo towera kumalisa Danyeli akhaphata basa.

Mudadziwa Mambo Dariyo thangwi ikhafunira amuna kuti mwambo unoyu ucitiwe, iye atsukwala kakamwe. Mbwenye iye nee anakwanisa kucinja mwambo, natenepa akhafunika kutuma kuti Danyeli aponyiwe m’dzenje ya zinkhalamu. Mbwenye mambo apanga Danyeli: ‘Ndisadikhira kuti Mulungu wako, anatumikira iwe, anadzakupulumusa.’

Dariyo anenseka kakamwe kwakuti nee akwanisa kugona namasiku aneale. Mangwana mwace namacibese iye athamangira ku dzenje ya zinkhalamu. Mungakwanise kumuona pano. Iye akhuwa: ‘Danyeli, nzakazi wa Mulungu wamaso! Kodi Mulungu anatumikira iwe akwanisa kukupulumusa ku zinkhalamu?’

Danyeli atawira: ‘Mulungu atumiza anju wace mbafunga milomo ya zinkhalamu, natenepa zidandiphekesa tayu.’

Mambo akomerwa kakamwe. Atuma kuti Danyeli abuluswe m’dzenje. Buluka penepo atuma kuti aponyiwe ku zinkhalamu amuna akuipa ale akhafuna kumalisa Danyeli. Mbasati fika kwene pantsi pa dzenje, zinkhalamu zaaphatha mbiziswa magogodo awo onsene.

Buluka penepo Mambo Dariyo alemba kwa mbumba yonsene m’umambo wace: ‘Ndikutonga kuti anthu onsene asafunika kulemedza Mulungu wa Danyeli. Iye asacita pirengo pikulu. Apulumusa Danyeli m’kukhonda dyiwa na zinkhalamu.’