Tantara 79

Natao Tan-Davaky Misy Liona tao Daniela

SAHÌRA biby ty fanentea an’i Daniela eto. Fe tsy manino aze liona reo! Hainao va ty antone? Ia va ty nametrake an’i Daniela hiarake amy liona reo io? Ndao ho henteantsika.

Dariosy ty anara’ty mpanjakan’i Babylona henany zao. Tea maré an’i Daniela mpanjaka io, satria soa fanahy noho hendry. Nifìly an’i Daniela mba ho sefo-be tamy fanjakàne tao Dariosy, ka nanjary nialo an’i Daniela ty lahilahy hafa tamy fanjakà io tao. Ho’zao ty raha nataon-droze.

Nandeha tamin’i Dariosy tany roze ka nanao hoe: ‘Nifanarake iaby lahy zahay mpanjaka, fa tokone hasianao lalàna mikasike ty fivavàha amintsika eto. Tokone tsy hisy olo mahazo mivavake ami-ndranahare na amin’olo hafa, laha tsy aminao raike avao anaty 30 andro. Ka laha misy tsy manorike lalàna io, le tokone hatorake an-davake misy liona ao.’ Tsy hain’i Dariosy mihitsy hoe ino tetike atao lahilahy reto io, ka le natao an-taratasy lalàna iny. Tsy azo ovà sasy lalàna io henany zao.

Laha fa nirén’i Daniela ty mikasike lalàna io, le nandeha tan-tranone ane ie, mba hivavake amin’i Jehovah, manahake ty fataone isan’andro. Hay lahilahy raty fanahy reo fa mbo hanohy hivavake amin’i Jehovah avao Daniela. Faly bibike roze, satria ho tanterake ty fikasàn-droze hamono an’i Daniela.

Laha fa nihain’i Dariosy tafara atoy, ty antone nitiava lahilahy reo hanao lalàna io, le nalahelo biby ie. Fe tsy afake manova lalàna io sasy ie. Nivòla ty miaramilane Dariosy mba hanorake an’i Daniela an-davaky misy liona ao. Fe hoy ty asa mpanjaka tamin’i Daniela: ‘Atokisako soa, fa hanampy noho hanavotse anao, Andranahare aze tompoinao iny.’

Tsy hitan’i Dariosy ty hataone ka tsy niroro mihitsy ie halike iny. Laha fa hamaray maraindray, le nandeha tan-davaky misy liona tany malaky Dariosy. Hitanao ie amy sary eo io. Nikaikaike ie hoe: ‘Daniela mpanompo-Ndranahare! Afake nanavotse anao tsy hohani’ty liona va Andranahare ivavahanao iny?’

Namaly Daniela hoe: ‘Nanirake ty anjeline Andranahare, ka nohilìne ty vava liona reo soa tsy hihina ahy.’

Faly bibike mpanjaka iny. Novolànine ty mpanompone mba hampiakatse an’i Daniela baka an-davake ao. Bakeo novolànine kea roze mba hanorake lahilahy raty fanahy ta hamono an’i Daniela reny, an-davake ao. Mbo tsy niavy tamy farane ambany amy lavaky iny iaby roze, le fa notaritarihy liona reny, ka notampatampahane ty taòlan-droze.

Nanoratse ho ahi’ty vahoakine Dariosy mpanjaka laha fa bakeo hoe: ‘Mivòla aminareo aho, fa tokone hanaja ty Andranaharen’i Daniela ty olo kiraidraike, satria Mpanao fahagagà mahatserike ie. Namonjy an’i Daniela tsy ho hani’ty liona ie.’

Daniela 6:2-29.