OI, AUE! E foliga mai na i ai Tanielu i le tele o faalavelave. Ae e le o afaina o ia mai leona! Pe e te iloa ai se ā? O ai na tuuina Tanielu i inei faatasi ma nei leona? Sei o tatou sueina

O le tupu nei o Papelonia o se tamaloa e igoa i a Tariu. E fiafia tele o ia i a Tanielu auā e agalelei toe poto Tanielu. Ua filifilia e Tariu Tanielu e fai ma pule sili i lona malo. Ona loto leaga ai lea o isi tamaloloa i a Tanielu, o le mea la lenei na latou faia.

Ona latou fai lea i a Tariu: ‘Ua matou malilie, e tatau ona e fai se tulafono faapea mo le 30 aso e sa se tagata ona tatalo atu i se isi atua, po o se isi tagata ae ua na o oe lava le tupu. O lē e le usitai, e lafoina i le lua o leona.’ E lei iloa e Tariu le mafuaaga na mananao ai tagata e fai lenei tulafono. Ae na manatu o ia o se mea lelei, o lea na ia tusia loa le tulafono. Ua le mafai nei ona toe suia

Ina ua iloa e Tanielu le tulafono, ona ia alu lea i lona fale ma tatalo e pei ona masani ai. Ua iloa e tamāloloa leaga e le mafai ona taofia Tanielu mai le tatalo atu i a Ieova. Ua fiafia i latou, talu ai e foliga o le a manuia fuafuaga mo le aveeseina o Tanielu.

Ina ua iloa e Tariu le pogai na ala ai ona faia e nei tamaloloa le tulafono, sa faanoanoa tele o ia. Ae ua le mafai ona ia suia le tulafono, o lea na ia faatonuina ai e lafo Tanielu i le lua o leona. Ae na fai atu le tupu i a Tanielu: ‘Ou te faamoemoe o lou Atua, le o e auauna i ai, o le a ia laveaiina oe.’

Na le fiafia Tariu, ua le mafai ona moe i le po. I le isi taeao, na ia tamoe atu ai i le lua o leona. E pei ona e vaai atu i ai. Na ia valaau atu: ‘Tanielu, auauna a le Atua soifua! Pe na mafaia ea e le Atua o loo e auauna i ai ona laveai iā te oe mai leona?’

‘Na auina mai e le Atua lana agelu,’ o le tali lea a Tanielu, ‘ma tapuni i gutu leona, o lea na latou le aaiina ai au.’

Ua fiafia tele le tupu. Na ia poloai ma ia ave aʻe Tanielu mai le lua o leona. Ona ia lafoina lea o tamaloloa na taumafai e aveesea Tanielu i le lua o leona. A o lei oo atu i le taele o le lua, na saeia i latou e leona ma faamalū o latou ponaivi.

Ona tusi atu lea o le Tupu o Tariu i tagata o lona malo: ‘Ou te poloaiina tagata uma ia faaaloalo i le Atua o Tanielu. E faia e ia vavega tetele. Na ia laveaia Tanielu mai le aaiina e leona.