TORI 79
Danièl na ini a lew-olo
SAN! A gersi leki Danièl de na ini bigi problema! Ma den lew no e du en noti! Yu sabi fu san ede? Suma ben poti Danièl dya na mindri ala den lew disi? Meki wi go luku dati.
A man di de kownu fu Babilon now, nen Darius. A lobi Danièl tumusi, fu di Danièl abi switifasi èn a koni. Darius poti Danièl leki wan edeman fu den tiriman na ini en kownukondre. Disi e meki tra man na ini a kownukondre dyarusu nanga Danièl. Sobun, disi na san den e du:
Den e go na Darius èn e taki: ’Wi agri nanga makandra, o kownu, taki yu musu meki wan wet, pe tanapu taki 30 dei langa nowan sma mag begi nowan tra gado noso libisma leki yu wawan, o kownu. Efu wan sma no gi yesi, dan den musu iti en go gi den lew.’ Darius no sabi fu san ede den man disi wani a wet disi musu meki. Ma a e feni en wan bun prakseri; fu dati ede a e skrifi a wet. Now a wet no man kenki moro.
Te Danièl yere fu a wet, dan a e go na oso èn e begi soleki fa a gwenti du ala ten. Den ogri man ben sabi taki Danièl no ben sa tapu fu begi Yehovah. Den breiti, bika a gersi leki a prakseri fu den fu puru Danièl na pasi sa waka bun.
Te Kownu Darius kon sabi fu san ede den man disi ben wani fu a wet disi meki, dan a e sari tumusi. Ma a no kan kenki a wet; fu dati ede a musu gi komando fu iti Danièl go na ini a lew-olo. Ma a kownu e taigi Danièl: ’Mi howpu taki a Gado fu yu di yu e dini, sa yepi yu.’
A sani e trobi Darius so te, taki a no man sribi a neti dati. A tamara mamanten a e lon go na a lew-olo. Yu e si en drape? A e bari, taki: ’Danièl, futuboi fu a libi Gado! A Gado di yu e dini, ben man fri yu fu den lew?’
’Gado ben seni en engel’, Danièl e piki, ’èn ben tapu den mofo fu den lew, so taki den no ben du mi noti.’
A kownu breiti so te. A e gi komando fu hari Danièl puru na a olo. Dan a e meki den iti den ogri man, di ben pruberi fu puru Danièl na pasi, go gi den lew. Ma bifo den man doro gron, dan den lew e grabu den kaba èn e broko den bonyo.
Dan Kownu Darius e skrifi gi ala pipel na ini en kownukondre: ’Mi e gi komando taki ibriwan sma musu gi grani na a Gado fu Danièl. A e du bigi wondru. A ben puru Danièl na a mofo fu den lew.’
