79-нҗы хекая

Даниел ёлбарслы чукурда

ВАХ, Даниел кын ягдая дүшен ялы-ла! Йөне ёлбарслар оңа дегенок! Билйәңми нәме үчин? Аслында, Даниели ёлбарслы чукура ким зыңдыка? Гел, билели.

Инди Бабылда Дарий атлы адам патышалык эдйәр. Ол Даниели говы гөрйәр, себәби ол акылдар хем говы адамды. Дарий өз патышалыгында Даниели хөкүмдар беллейәр. Патышалыкдакы бейлеки адамлар болса, гөрипликден яңа оңа яманлык эдип башлаяр.

Олар Дарийиң янына гелип: «Эй патышамыз, 30 гүнүң ичинде сенден башга хич киме дога этмели дәл дийип, канун чыкаралы. Ким бу кануны бозса, оны ёлбарслы чукура зыңмалы» диййәрлер. Дарий оларың нәме үчин бейле канун чыкармак ислейәндигини билмейәрди. Йөне оларың айданы патыша яраяр, шонуң үчин шейле канун чыкаряр. Инди ол кануны ятырып билмейәрди.

Даниел канун барада эшитсе-де, өйүне барып, өңкүси ялы дога эдйәр. Эрбет адамлар Даниелиң Ехова дога этҗегини билйәрди. Олар муны билип, бегендилер, себәби шейдип Даниели өлдүрерис өйдйәрдилер.

Дарий патыша бу адамларың максадыны биленде, гаты гынанды. Йөне Дарий бу кануны инди ятырып билмейәрди, шонуң үчин Даниели ёлбарслы чукура зыңмалы болды. Эмма ол Даниеле йүзленип: «Сениң гуллук эдйән Худайың сени халас этҗекдигине мен ынанярын» диййәр.

Дарий гайгыдан яңа гиҗе ятып билмейәр. Эртир ирден ол ёлбарслы чукура ылгап баряр. Суратда гөршүң ялы ол: «Дири Худайың гуллукчысы Даниел! Сениң гуллук эдйән Худайың ёлбарслардан халас этдими?» дийип гыгыряр.

Даниел оңа: «Худай перишдесини иберип, ёлбарсларың агзыны япды. Олар маңа дегмеди» дийип җогап берйәр.

Патыша йүрекден бегенйәр. Ол Даниели чукурдан чыкарып, оңа дерек оны өлдүрҗек болан эрбет адамлары зыңмагы буюряр. Бу адамлар энтек чукурың дүйбүне етип-етмәнкә, ёлбарслар олары ийдилер.

Шондан соң Дарий патыша: «Мен хемме адамлара Даниелиң Худайына хормат гоймагы буюрярын. Ол улы гудратлар гөркезйәр. Ол Даниели ёлбарслардан халас этди» дийип, патышалыгының әхли яшайҗыларына хат язяр.

Даниел 6:1—28.