Makani 79: Daniyeli Mumulindi Waba Syuumbwa
MAAWE! MAAWE! Kulibonya mbuli kuti Daniyeli uli mumapenzi manji. Pele basyuumbwa tabamulumi. Hena ulicizyi ncobatamulumini? Ngwani wamubikka Daniyeli muli basyuumbwa banji boobu? Atubone.
Mwami wa Bbabbuloni uulela lino muntu wiitwa kuti Daliyasi. Ulamuyanda kapati Daniyeli nkaambo Daniyeli muntu uujisi lubomba alimwi musongo. Daliyasi wamusala Daniyeli kuba muleli mupati mubwami bwakwe. Eeci capa kuti bantu bamwi mubwami bamufwide munyono Daniyeli, aboobo nceeci ncobacita.
Baunka kuli Daliyasi bati: ‘Twazumina Omwami kuti ubikke mulawo wakuti mumazuba aali 30 taku muntu weelede kupaila kuli leza nikuba kumuntu uumbi ccita buyo kuli nduwe Omwami. Ikuti uumwi watacita oobo, weelede kuwaalwa mumulindi wabasyuumbwa. Daliyasi tazyi bantu aaba ncobayandila kuti mulawo ooyu ubikkwe. Pele uyeeya kuti ooyu muzeezo mubotu, aboobo waubikka mulawo kwiinda mukuulemba. Aciindi aawa mulawo taukonzyi kucincwa.
Daniyeli amvwe mulawo wabikkwa, waunka kuŋanda kwaakupaila mbuli mbwacita lyoonse. Bantu babi bakalizyi kuti Daniyeli takonzyi kuleka kupaila kuli Jehova. Balikkomenyi, nkaambo kulibonya kuti muzeezo wabo wakuyanda kujaya Daniyeli ulabeleka.
Daliyasi wausa kapati naazyiba kaambo bantu aaba ncobakali kuyandila kubikka mulawo ooyu. Pele lino takonzyi kuucinca mulawo, nceelede buyo kucita nkwaambila bantu kuwaala Daniyeli mumulindi wabasyuumbwa. Pele mwami waambila Daniyeli kuti: ‘Ndisyoma kuti Leza wako ngokomba ulakuvwuna.’
Daliyasi camucima cakuti waba acilabila masiku. Buce buyo wabalikila kumulindi wabasyuumbwa. Ulakonzya kumubona aalya. Daliyasi woongolola wati: ‘Daniyeli mubelesi wa Leza muumi! Hena Leza ooyo ngobelekela wakonzya kukuvwuna kuli basyuumbwa?’
Daniyeli wavwiila kuti: ‘Leza watuma mungelo wakwe walo wajata milomo yabasyuumbwa kuti batandilumi.’
Mwami wakkomana kapati. Walailila kuti Daniyeli agusyigwe mumulindi. Kumane waleta bantu babi aabo bakali kuyanda kujaya Daniyeli wabawaala muli basyuumbwa. Kabatanasika ansi, basyuumbwa babakwabila akubatyoloola zifwuwa zyoonse.
Kumane Mwami Daliyasi walembela bantu boonse bali mubwami bwakwe kuti: ‘Muntu woonse weelede kumulemeka Leza wa Daniyeli. Ulacita maleele aayoosya. Wakamuvwuna Daniyeli kuli basyuumbwa bakali kuyanda kumuluma.’
Daniyeli 6:1-28.
Mibuzyo
- Ngwani Daliyasi, alimwi mbuti mbwaakamubona Daniyeli?
- Mbuti bantu basimunyono mbobamupa Daliyasi kuti acite?
- Ncinzi Daniyeli ncaacita naamvwa mulawo mupya?
- Nkaambo nzi Daliyasi camucima cakuti waba acilabila, alimwi ncinzi ncaakacita buce buyo?
- Mbuti Daniyeli mbwaamuvwiila Daliyasi?
- Ncinzi cacitika kubantu babi bali kuyanda kujaya Daniyeli, alimwi ncinzi Daliyasi ncaalembela bantu boonse bali mubwami bwakwe?
Mibuzyo aimwi
- Bala Daniyeli 6:1-28.
Mbuti kutamikizyigwa kaambo kwa Daniyeli mbokutuyeekezya basikukazya mbobasoleka kudyaaminina mulimo wa Bakamboni ba Jehova mazuba aano? (Dan. 6:7; Int. 94:20; Is. 10:1; Balo. 8:31)
Mbuti babelesi ba Leza mazuba aano mbobakonzya kumwiiya Daniyeli kuzumanana kulibombya ‘kubaleli bacisi’? (Dan. 6:5, 10; Balo. 13:1; Inc. 5:29)
Mbuti mbotukonzya kwiiya cikozyanyo ca Daniyeli cakubelekela Jehova “lyoonse”? (Dan. 6:16, 20; Flp. 3:16; Ciy. 7:15)
