MAHANO! Danieri nazooka ali mukasumi akabi. Kyonka entale tizimuliire! Nomanya habwaki? Oha ayataire Danieri omuntale zinu zona? Katukizoole.

Omukama arukulema Baburoni hati nayetwa Daliyo. Nagonza Danieri muno, habwokuba Danieri aine embabazi kandi w’amagezi. Daliyo akakoma Danieri kuba omulemi omukuru mubukama bwe. Kinu kikaleetera abakuru abandi omubukama bunu kukwatirwa Danieri ihali, nahabwekyo bacwamu kugira ekibaakora.

Bakagenda hali Daliyo kandi bamugambira bati: ‘Itwe tucwiremu Ai omukama, okole ekiragiro ekirukuragira ngu omuntu weena aleeke kusaba ruhanga ondi weena rundi omuntu ondi weena kwihaho iwe omukama kumara ebiro 30. Kakuba omuntu weena ajeema, anagwe mukiina haali entale.’ Daliyo atamanye habwaki abasaija banu nibenda ekiragiro kinu kikorwe. Baitu habwokuba akatekereza ngu kitekerezo kirungi, nukwo kuhandikisa ekiragiro kinu. Ekiragiro kinu tikisobora kuhindurwa.

Danieri obuyahulire eby’ekiragiro kinu, yagenda omunju ye, yasaba nkoku yakoraga butoosa. Abasaija banu ababi bakaba nibakimanya ngu Danieri akaba takusobora kuleka kusaba Yahwe. Bakasemererwa habwokuba entegeka yabu ey’okuhwerekereza Danieri ekaba nezooka nkerukugenda kuhiki’ra.

Omukama Daliyo obu yayetegerize ensonga eyaletiire abasaija banu kutekaho ekiragiro kinu, akasaasa. Baitu akaba atarukusobora kuhindura ekiragiro kinu, nahabwekyo akaba aine kuragira Danieri anagwe omu kiina ky’entale. Kyonka omukama akagambira Danieri ati: ‘Kanihire Ruhanga waawe ow’orukuhereza naija kukujuna.’

Habwokutatekana, Daliyo atasobole n’okubyama ekiro ekyo. Obu bwakiire, akairuka yagenda ha kiina ky’entale. Norora nuho ali. Yayamirra: ‘Danieri, omuhereza wa Ruhanga omwomezi! Ruhanga ow’orukuhereza asoboire kukujuna entale?’

Danieri amugarakamu ati: ‘Ruhanga atumire maraika we yaigarra eminwa y’entale tizisoboire kunkoraho akabi koona.’

Omukama asemererwa muno. Aragira Danieri okwihibwa mu kiina ky’entale. Nukwo aragira ngu abasaija bali ababi abakaba nibenda kuhwerekereza Danieri banagwe omukiina ky’entale. Obu bakaba batakahikire hansi omu kiina ky’entale, entale zibagwera zibacwa amagufa gabu goona.

Hanyuma, omukama Daliyo ahandikira abantu boona ab’omubukama bwe ati: ‘Nindagira nti buli muntu aine kuha Ruhanga wa Danieri ekitiinisa. Nakora ebyamahano by’amaani. Ajunire Danieri butaliibwa entale.’