AWONA! Cikuwoneka nga ni para kuti Daniyele wali mu suzgo yikuru comene. Kweni nkharamu zikumupweteka yayi! Kasi ukumanya cifukwa cake? Kasi ni njani uyo wakaponya Daniyele mukati mu nkharamu zose izi? Tiye tiwone.

Dariyasi ndiyo wakaŵa fumu ya Babulone pa nyengo iyi. Wakamutemwa comene Daniyele cifukwa Daniyele wakaŵa walusungu ndiposo wavinjeru. Dariyasi wakasankha Daniyele kuŵa muwusi mulara mu ufumu wake. Ici cikapangiska ŵanalume ŵanyake kumucitira sanji, ntheura ici ndico ŵakacita.

Ŵakaluta kwa Dariyasi na kumuphalira kuti: ‘Tazomerezgana kuti imwe muŵike dango lakuti paŵavye munthu waliyose uyo wakwenera kulomba kwa ciuta panji munthu munyake padera pa imwe kwa mazuŵa 30. Usange munthu munyake waleka kupulikira, mbwenu wakwenera kuponyeka mu cizenje [cikhululu] ca nkharamu.’ Dariyasi wakamanyanga yayi cifukwa ico ŵanalume aŵa ŵakakhumbira kuti paŵe dango ili. Kweni wakaghanaghana kuti ni ghanoghano liwemi, mwantheura wakazomerezga na kulemba dango ili. Mwakuyana na Ŵamedi na Ŵaperesiya, dango likasinthikanga yayi para lakakika.

Daniyele wakati wapulika za dango ili, wakaluta ku nyumba kwake na kwamba kulomba, nga ni umo wakacitilanga nyengo zose. Ŵanalume ŵaheni ŵala ŵakamanya kuti Daniyele wangaleka yayi kulomba kwa Yehova. Ŵakakondwa cifukwa pulani yawo ya kukoma Daniyele yikawoneka nga yiŵayendelenge.

Dariyasi wakati wapulika cifukwa ico ŵanalume aŵa ŵakakhumbilanga dango ili, wakakwiya comene. Kweni wakaŵavya mazaza gha kusintha dango, mwantheura wakalangura kuti Daniyele waponyeke mu cikhululu ca nkharamu. Fumu yikaphalira Daniyele kuti: ‘Nili na cigomezgo kuti Ciuta wako uyo ukuteŵetera wakuthaskenge.’

Dariyasi wakakwiya comene mwakuti wakatondeka kugona tulo nausiku. Kwati kwaca mulenji, fumu yikacimbilira ku cikhululu ca nkharamu. Ungayiwona pa cithuzithuzi apa yikulaŵiska mu cikhululu. Yikacemelezga kuti: ‘We Daniyele, muteŵeti wa Ciuta wamoyo! Kasi Ciuta uyo ukuteŵetera wakuthaska ku nkharamu?’

Daniyele wakazgora kuti: ‘Ciuta wakatuma mungelo wake na kujara milomo ya nkharamu mwakuti zilije kundipweteka.’

Fumu yikakondwa comene. Yikalangura kuti Daniyele ŵamufumiske mu cikhululu. Pamanyuma pake fumu yikalangura kuti ŵanalume ŵaheni awo ŵakakhumbanga kukoma Daniyele ŵaponyeke mu cikhululu ca nkharamu. Nkharamu zikaŵakora na kuteketa viwangwa vyawo vyose teketeketeke pambere ŵandafike pasi pa cikhululu.

Pamanyuma pake Fumu Dariyasi yikalembera kalata ŵanthu wose ŵa mu ufumu wake kuti: ‘Nkhulangura kuti munthu waliyose wakwenera kucindika Ciuta wa Daniyele. Wakucita minthondwe yikuru comene. Wakaponoska Daniyele ku nkharamu.’