ОЙТ! ДАНИИ́Л улуг айыылда хевирлиг. Ынчалза-даа арзылаңнар аңаа дегбейн турар! Билир сен бе, чүге? Чогум, кым Дании́лди бээр арзылаңнарже киир октапканыл? Билип алыылам.

Ам Вавило́нда хааннап турар кижиниң адын Да́рий дээр. Дании́л буянныг болгаш мерген угаанныг боорга, ол аңаа дыка ынак. Да́рий Дании́лди бодунуң күрүнезиниң башкарыкчызы кылдыр тургускан. Күрүнеде өске улус адааргап эгелээш, мындыг чүүл кылган.

Олар Да́рийге келгеш, мынчаар саналдаан: ‘О хаан, 30 хонук иштинде сенден өске кымга-даа мөргүүрү хоруглуг кылдыр хоойлу үндүрер болзуңза чогуур деп шиитпирледивис. Бир эвес кандыг-бир кижи хоойлу үрээр болза, ону арзылаңнарже октаптар ужурлуг’. Чүге ол улус шак ындыг хоойлу үндүрер деп турарының утказын Да́рий билбейн турар. Ынчалза-даа ол хоойлу аңаа таарымчалыг боорга, ол ону үндүрген. Ам хоойлуну өскертип болбас.

Дании́л хоойлу дугайында билип кааш, бажыңынга баргаш, биеэгизи дег мөргүп турар. Дании́л дөмей-ле Иеговага мөргүүрүн соксатпас деп, багай кижилер билир. Олар каржы чоруунга өөрүп турар, чүге дизе оларның Дании́лди чок кылыр бодалы боттанып турар ышкаш болган.

Ол улустуң чүү дээш ол хоойлуну үндүргенин билип кааш, Да́рий дыка муңгараан. Ынчалза-даа ол чүнү-даа өскертип шыдавас болгаш, Дании́лди арзылаңнарлыг оңгарже киир октаптар кылдыр дужаал бээр ужурга таварышкан. Ынчалзажок Дании́лге хаан чугаалаан: ‘Сээң чүдүп турар Бурганың сени камгалап алыр деп, идегеп тур мен’.

Да́рий муңгарааш, ол хондур удуваан. Эртен эрте ол арзылаңнарлыг оңгарже халып каан. Чурукта ону көр даан. Ол алгырып чугаалаан: ‘Дании́л, дириг Бурганның бараалгакчызы! Чүдүп турар Бурганың сени арзылаңнардан камгалады бе?’

— Бурган дээрде төлээзин чоргускан,— деп, аңаа Дании́л харыылаан, — ол арзылаңнарның аксын дуглаан, ынчангаш олар меңээ дегбеди.

Хаан бүгү сеткилинден өөрүп турар. Ол Дании́лди оңгардан уштур кылдыр, а Даниилден адырлырын бодаан багай кижилерни киир октаптар кылдыр дужааган. Ол кижилер аңдарлып бар чыдырда-ла, арзылаңнар халый бергеш, оларның шупту сөөктерин сыйып каапкан.

Ооң соонда Да́рий хаан күрүнезинде чурттап турар кижилерге бижээн: ‘Дании́лдиң Бурганынга хүндүткел чедирерин шупту кижилерге дужаап тур мен. Ол улуг хуулгаазыннар кылып турар. Ол Дании́лди арзылаңнардан камгалаан’.