CI MOLẼHA okuti Daniele o kasi kohele! Pole, olohosi ka vi kasi loku u ulia. Ove hẽ wa kũlĩha momo lie? Helie wa kapa Daniele veleva liolohosi? Tu konomuisi ndomo ca pita.

Soma yoko Bavulono wa tukuiwa hati Dariu. Soma Dariu wa solele calua Daniele, momo eye wa kala embombe kuenda wa loñolõhele. Dariu wa nõla Daniele oco a linge usongui uviali waye. Noke asongui vakuavo va fetika oku suvuka Daniele. Nye ovo va linga?

Ovo va enda ku Dariu va popia hati: ‘Tua tava A soma, okuti okuete oku linga ocihandeleko cimue cokuti vokuenda kuoloneke akũi atatu lomue o likutilila kosuku yimue ndaño komunu umue, te lika kokuove A soma. Nda umue wa lueya ocihandeleko eci, imbiwa veleva liolohosi.’ Dariu ka kũlĩhile esunga lieci alume vaco va pingila ocihandeleko eci. Pole, eye wa sima okuti ocisimĩlo cimue ciwa, kuenje wa tuma oku soneha ocihandeleko caco. Cilo, ocihandeleko ka citava oku ci pongolola vali.

Eci Daniele a yeva ocihandeleko caco, wa enda vonjo wa likutilila ndocituwa caye. Anyali va kũlĩhile okuti Daniele ka ka liwekapo oku likutilila ku Yehova. Omo liaco, ovo va sanjukile calua, momo va kala loku sima okuti onjongole yavo yoku pindika Daniele yika tẽlisiwa.

Eci Soma Dariu a limbuka esunga lieci alume vaco va pingila ocihandeleko caco, wa sumuile calua. Pole, ka ca tavele vali oku ci pongolola. Omo liaco, wa handeleka okuti Daniele a imbiwe veleva liolohosi. Soma wa popia la Daniele hati: ‘Suku yove, una o vumba oka ku popela.’

Dariu wa yokokele calua okuti vuteke waco ka kuatele otulo. Eteke likuavo lomẽle wa lupukila keleva liolohosi ndomo ci molẽha palo pociluvialuvia. Eye wa kaluka hati: ‘A Daniele ukuenje wa Suku ukuamuenyo! Suku yove una o vumba, wa tẽla hẽ oku ku popela kolohosi?’

Kuenje Daniele wa kumbulula hati: ‘Suku wa tuma ungelo waye, wa yika ovimẽla violohosi, kuenje ka via ndingile cime.’

Soma wa sanjuka calua. Kuenje wa handeleka okuti Daniele upiwa veleva liolohosi. Noke alume vaco va pindikile Daniele ovo va imbiwa veleva liolohosi. Osimbu handi ka va pitilile kosi yeleva, olohosi via va kuata kuenje via valia.

Omo liaco, Soma Dariu wa sonehẽla komanu vosi vusoma waye hati: ‘Ndi handeleka omanu vosi okuti va kuete oku sumbila Suku ya Daniele. Momo eye o linga ovikomo vinene. Haeye wa popela Daniele kunene wolohosi.’

Daniele 6:1-28.