Nganea 79: Daniele Bakoni ḽa Dzindau
Yowee! Zwi nga Daniele u khomboni khulu. Fhedzi dzindau a dzi mu huvhadzi! Ni a ḓivha uri ndi ngani? Ndi nnyi o posaho Daniele dzindauni idzi dzoṱhe? Kha ri zwi wane.
Zwino khosi ya Babele o vha e munna a no pfi Dario. O vha a tshi funesa Daniele lwe a mu nanga uri a vhe muvhusi muhulwane muvhusoni wawe. lzwi zwa ita uri vhaṅwe vhanna vhe vha vha vhe muvhusoni vha vhe na vivho nga Daniele, ngauralo vha ita hezwi.
![Dario](https://assetsnffrgf-a.akamaihd.net/assets/l/my/my_VE/79a.jpg)
Vha ya ha Dario vha ri: ‘Ro tendelana, khosi, uri u fanela u ita mulayo u no ri maḓuvha a 30 hu songo vha na ane a rabela mudzimu naho e ufhio kana muthu nga nnḓa ha iwe, khosi. Ane a si thetshelese, u fanela u poswa dzindauni.’ Dario o vha a sa ḓivhi uri ndi ngani avha vhanna vho ṱoḓa uri uyu mulayo u itwe. A ṅwala mulayo. Zwino wo vha u si nga si shandukiswe.
Daniele a tshi pfa nga ha mulayo, a ya hayani a rabela, sa zwe a vha a tshi itisa zwone. Vhanna vhavhi vho zwi ḓivha uri o vha a sa ḓo litsha u rabela Yehova. Vha takala, ngauri zwo nga maano avho a u vhulahisa Daniele o vha a tshi khou shuma.
Musi Khosi Dario a tshi pfa uri ndi ngani avha vhanna vho ṱoḓa u ita uyu mulayo, a ḓisola. Fhedzi o vha a sa koni u shandukisa mulayo, ngauralo a fanela u ṋea mulayo wa uri Daniele a poswe bakoni ḽa dzindau. Fhedzi khosi ya vhudza Daniele: ‘Ndi fulufhela uri Mudzimu wau, ane wa mu shumela, u ḓo u tshidza.’
Dario o vha o dinalea lwe a si kone u eḓela vhusiku honoho. Nga matsheloni a tevhelaho a gidimela bakoni ḽa dzindau. Ni nga mu vhona fhala. A vhidzelela: ‘Daniele mushumeli wa Mudzimu! Naa Mudzimu ane wa mu shumela o kona u u tshidza kha dzindau?’
![Daniele bakoni ḽa dzindau](https://assetsnffrgf-a.akamaihd.net/assets/l/my/my_VE/79.jpg)
Daniele a fhindula: ‘Mudzimu o rumela muruṅwa wawe a vala milomo ya dzindau uri dzi si nkhuvhadze.’
Khosi ya takala zwihulu. Ya laedza uri Daniele a bviswe bakoni. Zwino ya ri vhanna vhavhi vhe vha lingedza u vhulahisa Daniele vha poswe dzindauni. Vha sa athu na u swika fhasi bakoni, dzindau dza vha fara dza pwasha marambo avho oṱhe.
Khosi Dario a ṅwalela vhathu vhoṱhe vha re muvhusoni wawe: ‘Ndi laya uri muṅwe na muṅwe u fanela u ṱhonifha Mudzimu wa Daniele. U ita vhuṱolo vhuhulu. O tshidza Daniele dzindauni.’
Daniele 6:1-28.
Mbudziso
- Dario ndi nnyi, nahone o vha a tshi dzhia hani Daniele?
- Vhaṅwe vhanna vha re na vivho vho ita uri Dario a ite mini?
- Daniele o ita mini musi a tshi pfa nga ha mulayo muswa?
- Ndi ngani Dario o sinyuwa lwe a si kone na u eḓela, nahone o ita mini nga matsheloni a tevhelaho?
- Daniele o fhindula hani Dario?
- Ho itea mini kha vhanna vhoṱhe vhe vha lingedza u vhulaha Daniele, nahone Dario o ṅwalela vhathu vhoṱhe vha re muvhusoni wawe uri mini?
Mbudziso dzo engedzeaho
- Vhalani Daniele 6:2-29.
Tshimbevha tshe tsha itelwa Daniele tshi ri humbudza mini nga zwe vhapikisi vha lingedza u zwi ita u itela u thivhela mushumo wa Ṱhanzi dza Yehova musalauno? (Dan. 6:8; Ps. 94:20; Yes. 10:1; Vha-Roma 8:31)
Ṋamusi vhashumeli vha Mudzimu vha nga edzisa hani Daniele we a dzula a tshi ‘pfa muvhuso u vhusaho’? (Dan. 6:6, 11; Vha-Roma 13:1; Mish. 5:29)
Ri nga edzisa hani tsumbo ya Daniele ya u shumela Yehova “misi yoṱhe”? (Dan. 6:17, 21; Vha-Fil. 3:16; Ndzumb. 7:15)