Mwaha 79: Daniyeli Munlittini Na Amwatto
OH! VANIKHALA ntoko wira Daniyeli ori mmuxankiho muulupale. Masi amwatto khaninvulaliha owo! Munnisuwela nthowa naya? Tanii omuhenle mu Daniyeli ni amwatto ala otheene? Nrowee noone.
Mwene ooBabilonia vano mulopwana oniitthaniwa Dario. Owo onnimphenta vanceene Daniyeli okhala wira Daniyeli mutthu ooreerexa murima ni amiruku. Dario onnimuthanla Daniyeli okhala mukhulupale a alamuleli moomweneni mwawe. Ela enniwiiriha alopwana akina moomweneni omukhalela nrima Daniyeli, siiso ela ti etthu enipaka aya.
Awo anirowa wa Dario ni ohimya wira: ‘Nihaakhulelana, Khoo mwene, wira nyuwo moohaana opaka nlamulo nnihimya wira mmahiku 30 ohikhale mutthu onikela onvekela muluku mukina aahiiso mutthu muhikhanle nyuwo, Khoo mwene. Akhala wira mutthu mukina khoniiwelela, nto ohaana oriheliwa muri amwatto.’ Dario khonsuwela nthowa naya alopwana ala aniphavela aya opakiwa nlamulo nna. Masi onuupuwela wira ola muupuwelelo wooloka, siiso onniiriha nlamulo nno olempwa. Vano nlamulo nno khinnirukunuxiwa.
Vaavo Daniyeli vanisuwela awe sa nlamulo nno, owo onirowa owaani ni khiyavekela, siisaale siira awe mahiku otheene. Atthu ootakhala ale yaanisuwela wira Daniyeli khaarowa ohiya ovekela wa Yehova. Awo arii oohakalala, okhala wira malokiheryo aya a ommalamaliha Daniyeli anikhala ntoko wira annivara muteko.
Vaavo Mwene Dario vanisuwela awe nthowa naya atthu ala vaaphavela aya opaka nlamulo nna, owo onnoona othunku vanceene. Masi owo khonwerya orukunuxa nlamulo, siiso aahaana olamula wira Daniyeli oriheliwe munlittini na amwatto. Masi mwene onimuleela Daniyeli wira: ‘Kinnilipelela wira Muluku anyu, yoowo nyuwo onimurumeela anyu, onrowa owoopolani.’
Dario ori ooriipiwa murima, owo khonwerya orupa ohiyu ole. Voosiisu aya owo onitthimakela onlittini na amwatto. Nyuwo munoowerya omoona valee. Owo onnikhuwela oriki: ‘Daniyeli murumeyi a Muluku mukumi! Muluku yoowo onimurumeela anyu oowerya owoopolani wa amwatto?’
‘Muluku oorumiha nlaikha nawe,’ onnaakhula Daniyeli, ‘ni aahiwala iyano sa amwatto siiso-nto awo khakivulalinhe.’
Mwene orii oohakalala vanceene. Owo onilamula wira Daniyeli okumihiwe munlittini na amwatto. Nuumala vo oniruma wira atthu ootakhala yaale yeerenrye ommalamaliha Daniyeli ariheliwe munlittini na amwatto. Nlelo ahiphiiye vathii, amwatto annaakaphula ni otheenasa makhuva aya otheene.
Nuumala vo Mwene Dario onnilepa wa atthu otheene a omwene awe wira: ‘Kinnilamula wira ori otheene ohaana omuttittimiha Muluku a Daniyeli. Owo onnipaka mitikiniho suulupale. Owo oomoopola Daniyeli khohikhuuriwa ni amwatto.’
Daniyeli 6:1-28.
Makoho
- Dario tanii, ni onimuthokorerya sai Daniyeli?
- Etthu xeeni alopwana akina anrima enimwiiriha aya Dario opaka?
- Exeeni Daniyeli enipaka awe vaavo vanisuwela awe sa nlamulo nsyaa?
- Nthowa xeeni Dario ory’awe ooxanka vanceene ohinawerya orupa, nto onipaka exeeni mmeeloni mwaya voosiisu?
- Daniyeli onimwaakhula sai Dario?
- Exeeni eniwiiraneela atthu ootakhala yaale yeerenrye omwiiva Daniyeli, ni Dario onilepa exeeni wa atthu otheene a moomweneni mwawe?
Makoho oowuncererya
- Mmusome Daniyeli 6:2-29.
Moota xeeni wootheriwa wa Daniyeli onnuupuxerya aya anamavaanyiha aneererya okhoottiherya muteko wa Anamoona a Yehova mu okathi ola? (Dan 6:8; Sal 94:20; Yes 10:1; aRom 8:31)
Moota xeeni arumeyi a Muluku olelo animutakiha aya Daniyeli mu ovikaniha owiiwelela ‘aalupale aneettiha elapo’? (Dan 6:6, 11; aRom 13:1; Mit 5:29)
Ninwerya sai otthara ntakiheryo na Daniyeli na omurumeela Yehova ‘moohihiyererya’? (Dan 6:17, 21; aFil 3:16; Wis 7:15)
