ABAADAW! Baga hin namimeligro gud hi Daniel. Kondi diri hiya ginlalabtan han mga leon! Maaram ka ba kon kay ano? Hin-o an naglabog kan Daniel nganhi hini nga mga leon? Aton kitaon.

An hadi han Babilonya yana amo hi Dario. Naayon gud hiya kan Daniel tungod kay buotan hinduro ngan maaramon. Ginpili niya hi Daniel nga magin punoan nga magmarando ha iya ginhadian. Tungod hini, naawa kan Daniel an iba nga kalalakin-an ha ginhadian salit ini an ira ginbuhat.

Kinadto hira kan Dario ngan nagsiring: ‘Nagkasarabot kami, O hadi, nga maghimo ka hin balaud nga ha sulod hin 30 ka adlaw waray mag-aampo ha bisan hin-o nga dios o tawo, gawas la ngada ha imo, O hadi. An bisan hin-o nga diri sumunod, ilalabog ngadto ha mga leon.’ Diri maaram hi Dario kon kay ano nga karuyag himoon hini nga kalalakin-an ini nga balaud. Kondi ha iya hunahuna maopay ito nga ideya, salit iya ito gin-aprobahan. Yana, diri na ito mababag-o.

Han hinbaroan ni Daniel ito nga balaud, inuli hiya ngan nag-ampo, sugad han iya pirme ginbubuhat. Maaram an magraot nga kalalakin-an nga diri maundang hi Daniel ha pag-ampo kan Jehova. Nalipay hira tungod kay baga hin maglalampos an ira plano ha pagpatay kan Daniel.

Han hinbaroan ni Hadi Dario kon kay ano nga karuyag hini nga kalalakin-an nga himoon ini nga balaud, nasubo gud hiya. Kondi diri na niya ito mababag-o, salit napiritan hiya nga ipalabog hi Daniel ha lungib han mga leon. Kondi nagsiring an hadi kan Daniel: ‘Naglalaom ako nga luluwason ka han imo Dios nga imo gin-aalagaran.’

Nasubo gud hi Dario salit waray hiya mahingaturog hito nga gab-i. Kinabuwasan, kinadto dayon hiya ha lungib han mga leon. Makikita mo hiya ha retrato. Nagsinggit hiya: ‘Daniel, surugoon han buhi nga Dios! Ginluwas ka ba han Dios nga imo gin-aalagaran tikang ha mga leon?’

Hi Daniel binaton: ‘Ginsugo han Dios an iya anghel ngan gintak-om an baba han mga leon salit waray ako labti.’

Duro an kalipay han hadi. Nagsugo hiya nga kuhaon hi Daniel ha lungib. Katapos, iya iginpalabog ngadto ha mga leon an magraot nga kalalakin-an nga nagplano ha pagpatay kan Daniel. Waray pa hira makaabot ha sag-od han lungib, ginpanhaklam na hira han mga leon ngan ginpanbari an ira mga tul-an.

Katapos, nagsurat hi Hadi Dario ha ngatanan nga tawo ha iya ginhadian: ‘Nagsusugo ako nga tahuron gud han ngatanan an Dios ni Daniel. Nagbubuhat Hiya hin urusahon nga mga milagro. Ginpanalipdan Niya hi Daniel salit waray hiya kaona han mga leon.’