HISITOLIA 79
Ko Taniela ʼi Te Luo ʼo Te ʼu Laione
ʼE KOUTOU sio kia Taniela ʼe hage ʼe tau mo he fihifihia fakamataku. Kae ʼe mole kai ia e te ʼu laione! ʼE koutou ʼiloʼi pe koteā tona tupuʼaga? Ko ai ʼaē neʼe ina lī ia Taniela ki te ʼu laione? Tou vakaʼi pe koteā te meʼa ʼaē neʼe hoko.
Ko te hau ʼo Papiloni ʼi te temi ʼaia neʼe ko he tagata neʼe higoa ko Taliusi. Neʼe ʼofa ʼaupito ia kia Taniela koteʼuhi neʼe agalelei pea mo poto. Neʼe fili e Taliusi ia Taniela ko he tagata pule ʼi tona puleʼaga. Neʼe tupu ʼaki ai te maheka ʼo te tahi ʼu tagata ʼo te puleʼaga kia Taniela, pea neʼe nātou fai ai te puleʼaki ʼaenī.
Neʼe nātou ʼolo kia Taliusi pea nātou ʼui age: ‘Ê hau, ʼe mātou loto ke ke fai he lao ʼe ke fakatotonu ai, lolotoga ʼaho e 30 ʼe mole tonu anai ke faikole he tahi ki he tahi age ʼatua peʼe ko he tahi age tagata gata pe kia te koe, Ê hau. Kapau ʼe talagataʼa he tahi, pea ʼe tonu anai ke lī ia ia ki te luo ʼo te ʼu laione.’ Neʼe mole ʼiloʼi e Taliusi pe koʼe neʼe loto te ʼu tagata ʼaia ke ina fai te lao ʼaia. Kae neʼe ʼui maʼana ʼe ko he manatu ʼe lelei, koia neʼe ina fakatotonu ai ke tohi te lao ʼaia. ʼI te temi ʼaia neʼe mole feala ke toe fetogi te lao ʼaia.
ʼI te ʼiloʼi e Taniela te lao ʼaia, neʼe hū ia ki tona ʼapi pea faikole ohage ko tana agamāhani. Neʼe ʼiloʼi e te ʼu tagata agakovi ʼe mole tuku anai te faikole ʼa Taniela kia Sehova. Kua nātou fiafia, koteʼuhi ʼe hage kua hoko tanatou fakatuʼutuʼu ʼaē ke matehi ia Taniela.
ʼI te ʼiloʼi e te hau ko Taliusi te tupuʼaga ʼo te loto ʼo te ʼu tagata ʼaia ke ina fai te lao ʼaia, neʼe lotomamahi ʼaupito ai. Kae neʼe mole feala ke ina fetogi te lao, koia neʼe ina fakatotonu ai ke lī ia Taniela ki te luo ʼo te ʼu laione. Kae neʼe ʼui e te hau kia Taniela: ‘ ʼE ʼau falala ko tou ʼAtua, ʼaē ʼe ke tauhi ki ai, ʼe ina hāofaki anai koe.’
Neʼe lotohoha ʼaupito ia Taliusi ʼo mole mamoe ai ʼi te po ʼaia. ʼI te ʼala uhu ake neʼe lele ia ʼo fakasiosio te luo ʼo te ʼu laione. ʼE feala hakotou sio ki ai ʼi henī. Neʼe kalaga fēnei: ‘Taniela, kaugana ʼo te ʼAtua maʼuli! Neʼe hāofaki koa koe e te ʼAtua ʼaē ʼe ke tauhi ki ai mai te ʼu laione?’
Neʼe tali age e Taniela: ‘Neʼe fekauʼi mai e te ʼAtua tana ʼaselo, pea neʼe ina pupunu te gutu ʼo te ʼu laione ke mole nātou kai ʼau.’
Neʼe fiafia ʼaupito te hau. Neʼe ina fakatotonu ke toʼo ake ia Taniela mai te luo. Pea neʼe lī kiai te ʼu tagata agakovi ʼaē neʼe nātou faiga ke lī ia Taniela ki te luo ʼo te ʼu laione ke mate ai. Neʼe mole heʼeki nātou aʼu pe la ki te takele ʼo te luo, ka kua ʼohofi ia nātou e te ʼu laione pea mo gūgu tonatou ʼu hui.
Pea neʼe faitohi fēnei te hau ko Taliusi ki te hahaʼi fuli ʼo tona puleʼaga: ‘ ʼE ʼau fakatotonu ki te hahaʼi fuli ʼe tonu ke koutou fakaʼapaʼapa ki te ʼAtua ʼo Taniela. Neʼe ina fai te ʼu milakulo lahi. Neʼe ina hāofaki ia Taniela mai te luo ʼo te ʼu laione.’