Tantara 79

Daniela Tan̈aty Lavaka Lion

SAHIRAN̈A mare daonko Daniela io. Lion aby io tsy man̈ekitry izy! Hainao antony? Azôvy nan̈ano Daniela tan̈aty lavaka lion tao? Alô zahavatsika.

Dariosy an̈aran’ampanjakan’i Babylona iziô. Izy tia Daniela, fôtony Daniela tsara fan̈ahy ndreky misy jery. Dariosy nifidy izy, natao sefo tamy fanjakan̈anany. Lelahy sasany tao amy zay nafana fô Daniela, ke ty raha nataon-drô.

Irô nandeha tamy Dariosy nivolan̈a: ‘Zahay nifan̈araka fa anao tôkony han̈ano lalàn̈a mivolan̈a fa tsisy olo mahazo mivavaka amy zan̈ahary hafa an̈atin’ny 30 andra, fa aminao zaraiky fo. Zay olo tsy man̈araka zen̈y, tôkony hatsipy amy lion aby io ao.’ Dariosy tsy nahay nan̈ino olo aby io ti han̈ano lalàn̈a zen̈y. Izy nieritreritry fa hevitry mahômby zen̈y, ke lalàn̈a io nisoratan̈a tamy boky. Iziô amy zay lalàn̈a io fa tsy mety ivoan̈a eky.

Daniela naharen̈y lalàn̈a zen̈y, mbala nan̈ano karaha fataony fo. Izy niditry tamy tran̈onany nivavaka. Lelahy ratsy fan̈ahy aby in̈y nahay fa Daniela mbala hivavaka amy Jehovah fo. Irô ravoravo, fôtony irô nieritreritry fa mahômby tetikin-drô.

Ampanjaka Dariosy nanen̈iny mare, koa fa nahay nan̈ino olo aby io ti han̈ano lalàn̈a in̈y. Izy baka fa tsy mety man̈ova lalàn̈a in̈y eky, ke Daniela nirahiny natsipy tan̈aty lavaka lion. Ampanjaka io fo nivolan̈a tamy Daniela: ‘Zaho matoky fa Zan̈ahary tompoenao hamonjy anao.’

Dariosy niasa loha mare, ke tsy tafandry izy alin̈y araiky. Kiakan’izin̈y, izy nilomoay, nandeha tamy lavaka lion. Izy hitanao amy sary io. Izy nivolan̈a mare: ‘Daniela, mpanompon’ny Zan̈ahary velon̈o! Zan̈ahary ivavahanao nahavita namonjy anao edy?’

Daniela nivolan̈a: ‘Zan̈ahary nan̈iraka anjelinany, ke nafodiny vavan’ny lion aby io tsy handratra zaho.’

Ampanjaka in̈y ravoravo be. Nirahiny naboaka tan̈aty lavaka tao Daniela. Olo aby nitady hamono Daniela in̈y amy zay, nirahiny natsipy tamy lion aby io tao. Nata irô mbala tsendriky latsaka tambany, lion aby io fa nananty irô, ke irô lany mboan’ny taolany.

Ampanjaka Dariosy baka tiô nanoratra taratasy tamin’olo jiaby tamy fanjakan̈anany nivolan̈a: ‘Zaho man̈amia beko fa olo jiaby mila man̈aja Zan̈aharin’i Daniela. Izy nahavita fahagagan̈a maventy. Izy namonjy Daniela, beky tsy lanin’ny lion.’

Daniela 6:2-29.