OO, O! Yikuwoneka kuti Daniyele ali mu yipwetesi. Nambo masimbago ngagakum’wulasya! Ana akumanyilila ligongo lyakwe? Ana ŵani ŵaŵam’ŵisile Daniyele m’masimbamu? Kwende tulole.

Mwenye jwa ku Babelo sambano ali Daliyo. Jwalakwe akusamnonyela mnope Daniyele ligongo Daniyele ali mundu jwambone, soni jwalunda. Daliyo asagwile Daniyele kuŵa jwakulamulila jwamkulungwa mu ucimwene wakwe. Yeleyi yikutendekasya acalume ŵane mu ucimwenewo kumtendela jelasi Daniyele. Ssambano jemanjaji akutenda yakuyicisyayi.

Akwawula kwa Daliyo nikuŵeceta kuti: ‘Oo! Mwenye tukamulene kuti, ŵalakwe alinganye lilamusi lyakuti kwa masiku 30 akasimanikwa mundu ali mkupopela kwa Mlungu kapena kwa mundu jwalijose akaŵe kwa wawojope, naga jwine ngakupikanila, jwalakwejo akusosekwa kumponya mu lisimbo lya masimba. Daliyo ngakumanyilila ligongo lyakwe acalumeŵa akusaka kuti paŵe lilamusili. Nambo akuganisya kuti sili nganisyo syambone, m’yoyo jwalakwe akulemba lilamusi lila. Sambano lilamusili ngaŵa mkulisinda.

Daniyele papikene ya lilamusili, akwawula kumangwakwe kukupopela, mpela muŵatendelaga kala. Ŵandu ŵakusakalawo ŵayimanyi kuti Daniyele ngaŵa mkuleka kupopela kwa Yehofa. Jemanjaji akusangalala, ligongo akuyiwona kuti lisosa lyawo lyakumalana ni Daniyele cilikombolece.

Mwenye Daliyo pamanyilile ligongo lyakwe acalumeŵa ŵasakaga kuti lilamusili lipagwe, akudandawula mnope. Nambo jwalakwe ngaŵa mkusinda lilamusili, m’yoyo jwalakwe akusosekwa kulamula kuti Daniyele amponye mu lisimbo lya masimba. Nambo mwenye akumsalila Daniyele kuti: ‘Ngukulupilila kuti Mlungu jwenu, jwamkumtumicila, camkulupusye.’

Daliyo ali jwacanasa mnope mwati akulepela gona cilo celeco. Kundaŵi kwakwe jwalakwe akuwutucila ku lisimbo lya masimba kula. Akum’wona pelepo? Jwalakwe akuŵilanga kuti: ‘Daniyele, jwakutumicila Mlungu jwacijumi! Ana Mlungu jwenu jwamkumtumicila akombolece kumkulupusya mkamwa mwa masimba?’

Daniyele akwanga kuti: ‘Mlungu ŵatumisye malayika gakwe, nikugawugala masimba pakamwa, m’yoyo nganigambulasya.’

Mwenyejo asangalele mnope. Akulamula kuti amkoposye Daniyele mu lisimbomo. Kaneko akulamula kuti acalume ŵakusakala ŵala ŵaŵasakaga kumalana ni Daniyele, ŵaponye mu lisimbo lya masimbamo. Mkanayice pasi mwisimbomo, masimbago gakwakamula ni kwapwepweta ni maupa gawo gakwe.

Kaneko Mwenye Daliyo akulemba yikalata kwa ŵandu ŵakwe wosope mu ucimwene wakwe acitiji: ‘Une ngulamula kuti jwalijose akusosekwa kucimbicisya Mlungu jwa Daniyele. Jwalakwe akusatenda yakusimonjesya yekulungwa. Akulupwisye Daniyele kuti akaligwa ni masimba.’